Men jalǵyz emespin: Instagram-daǵy bir vıdeo pavlodarlyq jetim qyzdyń taǵdyryn qalaı ózgertti

Bir kúnde oryndalǵan arman

Anastasııanyń jasy 32-de. Jetimder úıinde tárbıelengen názik qyz jastaıynan taǵdyr taýqymetin bastan keshirdi. Basynda baspanasy, janynda kómektesetin birde-bir jaqyn týysy joq ol muńǵa jıi batyp, qıyndyqtan shyǵatyn joldy izdeıtin. Qaryzǵa batyp alǵan páteriniń qunyn tóleý qorqynyshqa aınaldy. Onsyz da az jalaqysy iship-jeminen artylmaıtyn. Birde Nastıa Instagram-daǵy paraqshasynda aınalasyndaǵy meıirban adamdar kórer, estir degen úmitpen óziniń armany jaıynda baıandady. Nebári 5 myńdaı ǵana jazylýshysy bar onyń bul beınerolıgi sol sátte ǵalamtordy sharlap, myńdaǵan adamǵa tarap ketetinin kim bilgen.

«Eger tym bolmaǵanda 30 myń adam maǵan 200 teńgeden aýdarsa, meniń jeke páterim bolar edi. Shaǵyn ǵana bolsa da meni sheksiz qýanyshqa bóleıtini anyq. Men álemge, ondaǵy adamdardyń sheksiz meıirbandyǵyna senemin» degen sózderi myńdaǵan júrekti jylytqany anyq edi. Tyǵyryqqa tirelgen boıjetkenniń taǵdyrǵa senýine nebári 24 saǵat qana qajet boldy. Beınerolık jarııalanǵan sátten bastap múlde beıtanys adamdar onyń esepshotyna aqsha aýdara bastaǵan. Al arada táýlik ótkende Anastasııanyń shotynda bir páterdiń qunyna jetetin aqsha jınalyp qaldy.

- Mundaı tańǵajaıyp oqıǵa ómirimde paıda bola qalǵanyna áli kúnge sene alar emespin. Áýel basta bankten májbúrli túrde aqshalaı nesıe rásimdegen edim. Oǵan quny 5,5 mln teńge turatyn, aýmaǵy 20,5 sharshy metr bir bólmeli shaǵyn páter satyp aldym. Al qazaqstandyqtar maǵan bir táýlik ishinde 8 mln teńgeden astam qarajat jıyp beredi dep kim oılaǵan!? 18 sáýir kúni jınalǵan aqshadan bankten alǵan nesıemdi, ıaǵnı úıdiń qunyn tolyqtaı ótedim. Qalǵan qarajattyń bir bóligin páterimdi jóndeýge jumsap jatyrmyn. Sondaı-aq anam men ájemniń zırattarynyń basyndaǵy eskertkishterin (krest) jańalaıtyn oıym bar. Maǵan osy kúnderi kómek surap habarlasqandar bar. Qaterli dertke shaldyqqan eki adamǵa qarajat aýdardym. Al adamdar maǵan áli kúnge aqsha aýdarýlaryn qoıar emes. Sondyqtan men aqsha jınaýdy toqtattym. Bul ýaqytqa deıin maǵan kómek kórsetken adamdarǵa alǵysym sheksiz! Men meıirban jandardyń aınalamyzda kóp ekenine shyn máninde kóz jetkizdim. Men ózimniń áli de ózgelerge kerek ekenimdi jan dúnıemmen sezindim, - dep tolǵandy Anastasııa.

Eseıý jyldaryndaǵy qıyndyq

Anastasııa 8 jasqa tolǵanda anasy aýyr dertten kóz jumyp, ol balalar úıine tárbıelenedi. Anasynyń ólimi janyna qatty batqan boıjetken uzaq jyldar psıhologııalyq kúızeliste júrdi. Deıturǵanmen ómirge qushtar qyz bilim alýǵa umtylyp, qatarlastarynyń aldy bolýǵa tyrysty. Áýeli jetim balalar men ata-anasynyń qamqorlyǵynsyz qalǵan balalarǵa arnalǵan № 1 mektep – ınternatynda, odan soń № 2 mektep-ınternatynda tárbıelendi. Mektepten soń Aqsý qalasyndaǵy Jaıaý Musa atyndaǵy kópsalaly kolledjine oqýǵa túsip, rejısser mamandyǵyn támamdaıdy. Ójet qyz odan soń qujattaryn Reseıdiń Omby memlekettik ýnıversıtetine tapsyryp, teatr jáne kıno akteri mamandyǵyn meńgerip shyǵady.

- Kishkentaı kezimde kitap oqyǵandy unattym. Meniń sózdik qorym baı boldy, óleń men shaǵyn áńgimeler jazatynmyn. Shyǵarmashylyqqa jaqyn bolýym óner salasyna alyp keldi. Jaıaý Musa atyndaǵy kolledjde oqyp júrgende bastapqyda baspana máselesi asa qıyn boldy. Internattan ketkennen keıin dalada qalǵandaı bolady ekensiń. Sol ýaqytta maǵan qamqorlyq tanytyp, óz úıinde turǵyzǵan ustazym Qaıyrjan Beısenbaevtyń kómegin áli kúnge umytpaımyn. Sol ýaqytta tsırk óneriniń bir túri – birneshe dopty bir ýaqytta qaqpaqyldaýdy (jonglırovanıe) úırenip aldym. Ol keıin Ombyda oqyp júrgende kúnkórisime qajet qarajat tabýyma sep boldy. Kóshede turyp, 4-5 dopty qolymmen qaqpaqyldap, óner kórsetetinmin. Adamdar aqsha berip ketedi. Sóıtip isher asyma, kıimime qajet aqsha taptym, - deıdi Anastasııa.

Ol birde avtostoppen Reseıdi aralap, Sýdak qalasyna deıin jetedi. Onda alǵash ret teńizdi kóripti. Alyp tolqyndary jaǵaǵa soǵyp, eshqashan tynshymaıtyn Qara teńizdiń ádemiligi áli kúnge esinde.

Anastasııa – teatr ártisi

Omby ýnıversıtetin támamdaǵan soń birden týǵan qalasy Pavlodarǵa oraldy. Bul ýaqytta elde koronavırýsqa baılanysty pandemııa júrip jatqan. Shekaralar jabylyp qalǵan kezeń. Ol shahardaǵy Chehov atyndaǵy drama tearǵa shaqyrý alady. Alǵashqy kezeńde kópshilik rólderdi somdap júrdi. «Dýbrovskıı» qoıylymynda rejısserlerdiń kózine túsip, «Tango na troıh» spektaklinde úı qyzmetshisiniń róli senip tapsyryldy. Keıin «Lıýbov ı golýbı», «Master ı Margarıta» jáne taǵy basqa qoıylymdarda mańyzdy rólderdi somdady. Búginde Nastıanyń akterlik sheberligi shyńdalyp, qalyptasý kezeńinde. Armandaǵan páterine qol jetkizgen ol endi ǵumyryn teatr ónerine arnaı beremin degen nıette.

- Teatrdaǵy eńbek ótilim 6 jyldan asty. Men belsendi bolǵandy unatamyn. Teatrda kez kelgen qoıylymda kishigirim ról usynsa da birden jan-tánimmen somdaýǵa kirisip ketemin. Barlyq is-sharaǵa úzbeı qatysýǵa tyrysamyn. Keıingi ýaqytta kıno kastıngterge qatysyp júrmin. Onyń ústine ıoga ónerin úırenip, búginde ıoga boıynsha jattyqtyrýshymyn, - dep áńgimesin jalǵaı tústi ol.

Ózgelerge kómek kórsetýdiń qadirin túsindim

Anastasııa úshin 16-17 sáýir kúnderi kórgen tústeı ǵajaıypqa toly ótti. Dál osy kezeńde ol qazaqstandyqtardyń qoldaýyna ıe bolyp, talaı jylǵy úkili úmiti oryndaldy.

- Men úshin tańǵalarlyq oqıǵalar bolyp jatyr. Úsh uıyqtasam túsime kirer me edi? Osy kúnderi ózgelerge kómek kórsetýdiń qadirin túsindim. Kómektiń úlken-kishisi bolmaıdy eken, kez kelgeni muqtajdar úshin asa mańyzdy ekenin paıymdadym. 18 sáýir kúni banktegi nesıemdi jaýyp, alǵan páterim úshin endi eshkimge boryshty emes ekenimdi sezingende qýanyshtan qatty tolqydym, - deıdi ol.

Sóz sońynda ol Qazaq elinde turyp jatqanyn maqtanysh etetinin atap ótti. Aıtýynsha meıirban adamdary kóp qoǵamnyń bolashaǵy zor. Memlekettik tildi mektep kezinde meńgermeı qalǵanyn ózi úshin úlken kemshilik dep sanaıtynyn, aldaǵy ýaqytta bul baǵytty myqtap qolǵa alatynyn jetkizdi.

Eske sala keteıik, 93 jastaǵy pavlodarlyq aqsaqal qajylyqqa dep jınaǵan aqshasyn múgedek balalarǵa úlestirip berdi.