«Men jabylyp qaldym» degen bıznesmender aıyppul tóleıdi
ASTANA. QazAqparat - Shyǵys Qazaqstan oblysynda memlekettik organdardyń tekserýine qarsylyq bildirgen eki kásipkerge 100 AEK kóleminde aıyppul salyndy, dep jazdy altaynews.kz.
Aýyldy jerlerde tekserýge kelgen memlekettik organdardyń ınspektorlaryna «men jabylyp qaldym» degen jalǵan aqparat beretin kásipkerler kezdesedi. Bul qýlyǵynyń kesirinen utylatyn taǵy da sol jeke kásipkerdiń ózi.
«Bıznesmenniń bul is-áreketi memlekettik organdardyń tekserýine qarsylyq bildirdi dep baǵalanyp, 100 AEK kóleminde aıyppul salynady. Búgingi kúni osyndaı eki jaǵdaı tirkeldi. Biz olardy teksermeı-aq qoıar edik, biraq, prokýratýra tarapynan narazylyq túsedi», - deıdi oblystyq qoǵamdyq densaýlyq saqtaý departamenti basshysynyń orynbasary Bolat Qýanyshbekov.
