Men jábirlenýshimin – Qaırat Nurtas málimdeme jasady
ASTANA. KAZINFORM – Astana qalasynyń ákimshilik ister boıynsha mamandandyrylǵan sotynda tanymal ánshi Qaırat Nurtastyń isi onlaın qaralýda.
Sot málimetinshe, eki hattama toltyrylǵan. Birinshisi – Ákimshilik quqyqbuzýshylyqtar týraly kodekstiń 73-baby 1-tarmaǵy – «Densaýlyqqa qasaqana jeńil zııan keltirý», ekinshisi – Qylmystyq kodekstiń 293-babynyń 2-bóligi - «Áýe kemesi bortynda jasalǵan buzaqylyq».
Q. Nurtastyń zańdy ókili ári anasy Gúlzıra Aıdarbekovanyń aıtýynsha, jábirlenýshi Asylbek Bekqaıyrov jáne aıyptalýshy Qaırat Nurtas – burynnan dos. Janjaldyń basty sebebi – ánshiniń shaqyrǵan toıǵa barmaýy.
«Meni dosym toıǵa shaqyrdy, oǵan bara almaımyn dedim. Barmasań tizerlep kelesiń dedi, men de kelmeımin dep balaǵatpen jaýap berdim. Sodan keıin ol meni ushaqtyń ishinde ustap alyp, sen meni balaǵattadyń dep, basymnan eki ret urdy. Meniń de namysym bar, men de ony urdym. Odan keıin tynysh otyrsam, artymnan kep taǵy urdy. Odan basqa eshteńe bilmeımin. Men qoǵamdyq tártipti buzbadym. Men jábirlenýshimin», - dedi Qaırat Nurtas.
Bort ushaǵynda qoǵamdyq tártip buzylǵanyn, jábirlenýshi densaýlyǵyna jeńil zalal keltirgenin rastady.
Óz kezeginde Asylbek Bekqaıyrov birinshi soqqyny Qaırat Nurtastyń ózi jasaǵanyn aıtýda.
«24 sáýirde Qaıratty Oral qalasyna dosymnyń toıyna shaqyrdym. Ol kisi jaýap bermedi, 7-8 ret qońyraý shaldym. Taǵy bir habarlama jiberdim, oǵan jaýap retinde balaǵat sózderi bar habarlama keldi. Ne sebepti meni balaǵattady, ánshiniń kómekshilerin surap bile almadym, Qaırattyń ózimen kezdese almadym. Ushaqta kezdesip qalǵanda qasyna baryp mán-jaıdy suradym, ol taǵy balaǵatpen jaýap qaıtardy. Bortserik meni alyp ketip jatqanda Qaırat meni uryp úlgerdi. Ekeýmiz janjaldastyq, sosyn úshaqtyń eki jaǵyna otyrǵyzyp qoıdy. Túskende birden qolymyzǵa kisen saldy, bizdi polıtsııa bólimine jetkizdi», - deıdi jábirlenýshi.
Jábirlenýshi A. Bekqaıyrov bitimgerlik boıynsha ótinim berdi jáne ánshige qarsy talap-aryzy joq ekenin aıtty. Osyǵan oraı, Q. Nurtas qorǵaýshysy ákimshilik istegi birinshi bapty qysqartýdy surady.
Al aıyptaýshy prokýror ánshini 15 táýlikke qamaýǵa alý jazasyn surady. Al ánshi alda birneshe kontsert pen toı josparlanǵanyn aıtyp, aıyppul salýdy surap otyr.
Sot sheshim shyǵarý úshin basqa bólmege ketti.
Eske sala ketsek, «Almaty-Astana» baǵytyndaǵy áýe reısinde usaq buzaqylyq jáne densaýlyqqa qasaqana jeńil zııan keltirý faktisi boıynsha ákimshilik is qozǵalǵan edi.
