Men jahandyq ınstıtýttardy ádil, tıimdi etý úshin tereń reformalar qarastyrýǵa shaqyrdym - Gýterrısh
ASTANA. KAZINFORM - BUU Bas Assambleıasy 79-shy sessııasynyń joǵary deńgeıdegi aptalyǵy qarsańynda Uıymnyń shtab-páterinde «Erteńgi kún úshin kópjaqty sheshimder» taqyrybynda eki kúndik «Bolashaq sammıti» bastaldy.
QR Syrtqy ister mınıstrligi baspasóz qyzmetiniń habarlaýynsha, sammıt jumysyna Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý bastaǵan qazaqstandyq delegatsııa qatysty.
Bul jahandyq is-shara BUU Bas hatshysy Antonıý Gýterrıshtiń bastamasymen ótkizilip, qazirgi tańdaǵy jáne keleshekte týyndaıtyn máselelerdiń birlesken sheshimderin tabýǵa baǵyttalǵan.
Sammıttiń ashylýynda BUU Basshysy HHІ ǵasyrdyń syn-qaterleri HHІ ǵasyrdyń sheshimderin talap etedi: jan-jaqty jáne ınklıýzıvti, sondaı-aq búkil adamzattyń tájirıbesine súıenetin negizdemelik sheshimder.
«Men bul Sammıtte BUU Jarǵysynyń qundylyqtaryna negizdelgen jahandyq ınstıtýttardy zańdy, ádil jáne tıimdi etý úshin tereń reformalardy qarastyrýǵa shaqyrdym», – dedi Bas hatshy.
Sammıtke BUU-ǵa múshe elderdiń memleketter men úkimetterdiń basshylary, syrtqy ister mınıstrleri, sondaı-aq halyqaralyq uıymdar men azamattyq qoǵam ókilderi qatysty.
Sapardyń alǵashqy kúni QR Syrtqy ister mınıstri M.Nurtileý Serbııanyń Syrtqy ister mınıstri Marko Djýrıchpen, Albanııanyń Syrtqy ister mınıstri Iglı Hasanımen, Angolanyń Syrtqy ister mınıstri Tete Antonıomen jáne Mońǵolııanyń Syrtqy ister mınıstri Batmýnhıın Battsetsegpen ekijaqty kezdesýler ótkizdi.
Kelissózder barysynda saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyqtyń qazirgi jaǵdaıy men damý perspektıvalary talqylandy.
Taraptar jahandyq jáne halyqaralyq kún tártibindegi ózekti máseleler boıynsha pikir almasty, sondaı-aq ózara is-qımyldyń barlyq baǵyttary boıynsha syndarly dıalogty jalǵastyrýǵa ýaǵdalasty.
Osyǵan deıin qyrkúıek aıynda Nıý-Iorkte Bolashaq sammıti ótetinin jarııaladyq. Osy halyqaralyq aýqymdaǵy is-sharaǵa oraı BUU Bas hatshysy Antonıý Gýtterıshtiń avtorlyq maqalasy jarııalandy. Kazinform oqyrman nazaryna atalǵan maqalanyń qazaq tilindegi beıresmı aýdarmasyn usyndy.
