Men Vınokýrovtyń naǵyz jankúıerimin - Fınlıandııalyq mınıstr
ASTANA. 4 qazan. QazAqparat - Bul týraly búgin Astanadaǵy «Saryarqa» velotreginde Qazaqstannyń velosporttan ulttyq quramasymen birge jattyǵý jasaǵan Fınlıandııanyń Eýropalyq odaq isteri jónindegi jáne syrtqy saýda mınıstri Aleksander Stýbb QazAqparat tilshisine bergen suhbatynda aıtty.
«Men ózimniń sezimimdi aıtyp jetkize almaı turmyn. Buryn-sońdy velodromda velosıpedpen júrip kórgen emespin. Onyń ústine «Astana» komandasynyń, Vladımır Vınokýrovtyń jankúıerimin. Árıne, ol búgin jattyǵýǵa kelse jaqsy bolar edi, alaıda jol júrip ketkendikten, kele almady», - dedi A. Stýbb.
Mınıstrdiń trıatlonmen, onyń ishinde velosportpen aınalysqanyna 4 jyldaı bolypty. Sodan beri «Astana» komandasyn tanyp-bilip, jankúıerine aınalyp úlgergen.
«Bir ókinishim, velosportpen keshirek, 40-tyń qyrqasyna shyqqannan keıin aınalysa bastadym. Degenmen, jas kezimnen sportqa beıimim bar», - deıdi sportshy mınıstr.
«London olımpıadasynda, shynymdy aıtsam, brıtan quramasynda óner kórsetken fındik sportshy ıÝssı Veıkkanenge jankúıer boldym. Brıtan quramasy jeńetin shyǵar dep oılaǵanmyn. Alaıda Vınokýrov jeńgen kezde óte qatty qýandym. Men onyń karerasyn jaqsy bilemin, «Týr de Fransta» jaraqat alǵanynan da habardarmyn. Al Olımpıada altyny karerasyndaǵy altyn táji boldy», - dep bólisti óz oıymen A. Stýbb.
«Sport men úshin ómirimniń qyzyǵy. Saıasatker bolǵandyqtan, jumys babymen 1 jyldaǵy 365 kúnniń 120-syn jolda, shetelderde ótkizemin. Eger de men sportpen aınalyspaǵan bolsam, osyndaı aýyrtpalyqty kótere almas ta edim. Shynymdy aıtsam, menen bilikti saıasatkerden góri kásibı sportshy ońaıyraq shyǵar ma edi dep oılaımyn keıde», - deıdi ol.
Aıta keteıik, bizdiń elde de velosportqa qyzyǵatyn mınıstrler bar. Olardyń biri retinde QR Qarjy mınıstri Bolat Jámishevti ataýǵa bolady.
