Men VІІ Qysqy oıyndarynda Qazaqstan namysyn qorǵaý úshin bar kúshimdi salamyn - Denıs Ten

-Denıs, qurdastaryńnyń kóbi úlken ómir tabaldyryǵynan endi attaǵaly otyr. Al sen bolsań halyqaralyq jarystarǵa qatysyp, Otanyńnyń mártebesi úshin úlken jaýapkershilik arqalap júrsiń. Bul qandaı sezim? Jáne de Vankýverdegi kórsetken ónerińe qandaı baǵa berer ediń?

-Árıne, Olımpıada oıyndary men úshin umytylmas oqıǵa boldy. Buǵan deıin men tájirıbeli sportshylar men jattyqtyrýshylardan osy saıystar týraly kóp estigenmin. Olımpıada chempıony Irına Slýtskaıanyń aıtýynsha, bul álem chempıonaty sekildi, bir aıyrmashylyǵy - mártebesi ózgeshe. Taǵy bir tanymal sportshy aıtqandaı, olımpıada oıyndary - qaptaǵan jarnama men BAQ ókilderiniń kóptep jınalatyn jeri. Olımpıada chempıony Braın Boıtano da olımpıadada óner kórsetkende ony jaı álem chempıonaty retinde qabyldaý kerek degen oı aıtypty. Biraq men Vankýverde bolǵan kezimde bul jarystardyń aýqymy men túrli sport túri boıynsha jarysqa kelgen sportshylardyń sanyna tańdandym. Qarapaıym qonaqúı emes, naǵyz úlken olımpıada qalashyǵy, jasalǵan barlyq jaǵdaılar, qaptaǵan kúzetshiler - osynyń barlyǵy men úshin jańalyq boldy, men ózb kózime sene almadym.

Muz aıdynyna shyǵar kezde men jattyǵýlar kezindegi qıyndyqtardy, ózge de problemalardy umytamyn. Vankýverde men ózime ózim: bul Olımpıada, maǵan bútkil elim qarap otyr, deıtinmin. Muhıttyń arǵy jaǵynda óz otandastaryńdy kezdestirgende jáne ózińniń eki júzden astam eldiń qataryndaǵy Qazaqstanyńnyń namysyn qorǵap júrgenińdi sezingende bir kóterilip qalady ekensiń. Al kópshiliktiń arasynan Qazaqstan týyn kórgende keýdeńdi maqtanysh sezimi kernep ketetini de ras. Bular men úshin 2010 jylǵy eń tamasha jarystar boldy. Osy jarystardyń beıne kóshirmesin jıi qaraımyn jáne sol kezderdiń qyzyǵy men shyjyǵy mol sátterin jylylyqpen eske alamyn. Árıne ol men úshin orasan tájirıbe boldy. Men Olımpıadaǵa qatysýǵa múmkindik alǵanyma qýanyshtymyn. Men ózimniń belgili fıgrýrst Evegnıı Plıýşenkomen óner kórsetkenimdi maqtan tutamyn. Onyń álemdegi mánerlep syrǵanaýshylardyń arasyndaǵy daryndysy ekendigi sózsiz. Olımpıadadan keıin Plıýşenko meni óziniń shoýyna shaqyrdy. Onyń ónerin tamashalaýǵa zor múmkindik aldym jáne eńbekqorlyǵy men ózin ózi ustaı bilýine tań qaldym. Men úshin álemniń úzdik fıgýrısterimen birge óner kórsetý úlken mártebe. Men olardyń óz isine degen yjdahattylyǵyn, talapshyldyǵyn jáne kórermenderine degen súıispenshiligin baıqadym.

- Amerıkandyq jattyqtyrýshymen birge jumysyńnan qandaı áser aldyń?

- Men onyń basshylyǵynda maýsym aralyq kezeńde, 2010 jyldyń jaz aıynan bastap jattyǵa bastadym. Shynyn aıtý kerek, ol ońaı bolǵan joq. Maǵan barlyq derlik tehnıkamdy aýystyrýǵa týra keldi. Bıylǵy maýsymdaǵy jarystar asa sátti bolǵan joq, oǵan qaramastan men ózimniń áleýetimdi paıdalanýǵa tyrysyp baǵýdamyn. Menen basqa Frenk Kerroldyń qol astynda fıgýrısterdiń úlken bir toby jattyǵýda. Keı kezderi bizdiń aıdynǵa Olımpıada chempıony Evan Laısıchık te keledi. Ol kezderi biz tańerteńnen keshke deıin onyń jattyǵýlaryna kýá bolamyz, ol tynymsyz jumys jasaıdy, quddy bir robot sekildi. F.Kerroldyń bos ýaqyty bola bermeıdi, biraq ol maǵan osy azdaǵan ýaqyttarda kóp nazar aýdarady. Meniń baǵdarlamam osy maýsymda tek tehnıkalyq jaǵynan ǵana ózgermeı, oǵan elementter arasynda qyzyqty da kúrdeli ótpeler men aýysymdar qosyldy. Qazirgi kúngi mánerlep syrǵanaýda tek kúrdeli sekirýler oryndap qana qoımaı, sonymen qatar baǵdarlamany jolaqtar, ótpeler arqyly júzege asyryp, onyń qyzyqty ete bilý basty maqsat. Muzda syrǵanaý tek tehnıkalyq jaǵynan ǵana qıyn emes, sonymen qatar ásemdigimen de erekshelenedi. Al baǵdarlama barlyq jaǵynan da turaqty, úılesimdi bolýy úshin kóp jumys jasaý qajet. Qazir men Azıadaǵa daıyndyqqa kóp ýaqytymdy bólýdemin. Alda tórtjyldyqtyń basty jarystary - Sochıdegi olımpıada da kútip tur.

- Sen ózińniń mektebińdi jáne qazaqstandyq jattyqtyrýshydan alǵan bilim negizińdi qalaı baǵalaısyń?

- Meniń baǵyma qaraı alǵashqy jattyqtyrýshym Aıgúl Qýanysheva boldy. Mánerlep syrǵanaýdyń basty bilimin berip, osy sportqa degen qyzyǵýshylyǵymdy oıatqan da sol kisi edi. Biraz ýaqyt ótkennen keıin biz aqyldasa otyryp, jattyǵýlarymdy reseılik maman Elena Vodorezovanyń qol astynda júzege asyrýym kerektigi týraly birlesken sheshim qabyldadyq. Bul men úshin mańyzdy qadam boldy, óıtken sen bir orynda turmaısyń, alǵa umtylyp, basqa deńgeıde óner kórsetesiń. Qazir mende ómirdegi taǵy bir saty - AQSh-taǵy jattyǵýlar.

- Aldaǵy Azıadada saǵan álemdik elıta quramyna kiretin Japonııa men Ońtústik Koreıanyń myqty sportshylarymen básekege túsýge týra keledi. Sen ol saıysqa daıynsyń ba?

- Shynynda da Japonııanyń mánerlep syrǵanaý mektebi álemdegi eń myqtylardyń qatarynda. Azıadaǵa kim keletini belgisiz, biraq Japonııanyń úzdik sportshylarynyń ondyǵynyń qataryna kiretin kez kelgen mánerlep syrǵanaýshynyń óte myqty ekenin bilemin. Men japonııalyq kóptegen mánerlep syrǵanaýshylarmen tanyspyn, onyń ishinde Vankýver olımpıadasynyń qola júldegeri Daısýke Takahashı da bar. Qazir ol óziniń baǵdarlamasymen, syrǵanaý sapasymen tańdaı qaqtyryp júr. Meniń Japonııa quramasynda kóptegen dostarym bar. Muz aıdyny syrtynda bizdi dostyq qarym-qatynas baılanystyrady. Biraq jarystarda biz básekelespiz, sondyqtan da Azıadada bizdi tartysty báseke kútip tur.

- Suhbatyńa rahmet, Denıs! Barlyq qazaqstandyqtar sen úshin jankúıer bolady. Biz saǵan tek tabysty óner tileımiz.