Men úshin Nazymnyń qolasy altynǵa bergisiz – Bas bapker

PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda áıelder boksynan búgin Nazym Qyzaıbaı qola medalǵa ıe boldy. Jekpe-jekten keıin áıelder boksynan Ulttyq quramanyń bas bapkeri Eldos Saıdalın kazinform tilshisine shaǵyn suhbat berip, óz pikirimen bólisti.

— Eldos Jánibekuly, Nazym Qyzaıbaıdyń jartylaı fınaldaǵy aıqasy týraly aıtyp ótseńiz?

— Jartylaı fınalda Nazym esh aıanyp qalǵan joq. Baryn saldy, fınalǵa shyǵýǵa degen óziniń erik-jigerin kórsetti. Qarsylasymyzdy ózderińiz bilesizder, óte myqty qarsylas. Biraq, qytaılyq boksshy qyz Nazymdy erekshe bir aıqyn basymdylyqpen utqan joq. Tóreshiler qytaılyq boksshynyń qolyn kóterdi. Sol boksshy fınalǵa shyqty.

— Negizi, jartylaı fınalda Nazym shyn máninde jeńildi dep oılaısyz ba?

— Myqtyny myqty dep moıyndaýymyz kerek. Bul — sport. Birde jeńesiń, birde jeńilesiń. Qytaı qyzy sál basymdylyq tanytqany úshin jeńisti alyp ketti.

— Nazym Qyzaıbaıdyń osyǵan deıingi jekpe-jekterine qandaı baǵa beresiz?

— Nazym Olımpıada oıyndary barysynda tórt birdeı jekpe-jek ótkizdi. Alǵashqylarynyń barlyǵyn taza, senimdi túrde utty. Tek jartylaı fınalda súrindik. Biraq, men Nazymǵa eshqandaı ókpem joq. Ol barlyq tapsyrmany oryndady. Qolaǵa qol jetkizdi. Júldeli orynǵa jetti. Parıjge tegin kelmegenin dáleldedi. Nazymnyń qola júldesi men úshin altynmen birdeı.

— Eger, Olıpıadaǵa qyzdarymyz tolyq quramda kelgende kórsetkish budan da jaqsy bolar ma edi?

— Ol da múmkin. Parıjge úsh qyz kelip, bireýi qolaǵa qol jetkizýi jaman kórsetkish emes.

— Al Karına Ibragımova men Valentına Halzovanyń jekpe-jekteri týraly ne aıtar edińiz?

— Ár jekpe-jekterdi halyq kórip otyr dep oılaımyn. Ol ekeýi de jaman judyryqtasqan joq. Olar da bar kúshin saldy. Jeńiske qol jetkizýge tyrysty. Bar ónerin kórsetti. Ózderi uıalatyndaı jekpe-jek kórsetken joq dep oılaımyn. Biraq, bul — Olımpıada. Tóreshiler qandaı sheshim shyǵardy, solaı bolyp qalady.

— Siz bas bapkerlikke Olımpıada oıyndarynyń aldynda ǵana taǵaıyndalǵanyńyzdy jaqsy bilemiz. Eger, erterek kelgende bul stsenarıı basqasha bolýy múmkin be edi?

— Ol jaǵyn naqtyly aıta almaımyn. Men bas bapkerlikke kelmeı turǵanda da, bul qyzdarymyz Ulttyq quramada boldy. Jospar boıynsha jarystarǵa qatysyp, oqý-jattyǵý jıyndaryn ótkizip júrdi. Menen buryn da Olımpıadaǵa daıyndaldy. Sondyqtan, men burynǵy bapkerlerdiń eńbegin joqqa shyǵarmaımyn.

— Kelesi Olımpıada oıyndaryna deıin bas bapker qyzmetinde qalǵyńyz kele me?

— Eger, el úmit artyp, qyzmetimizdi baǵalap jatsa, árıne qyzmet etýge daıynbyz. Kelesi AQSh-ta ótetin olımpıadaǵa tolyq quramda joldama alýǵa bar kúshimizdi salamyz.

— Siz Ulttyq quramanyń tizginin ustaǵanǵa deıin jastar quramasyn baptap kelgenińizdi bilemiz. Qazaq qyzdarynan kelesi Olımpıadada chempıon shyǵarýǵa qanshalyqty múmkindigimiz bar?

— Múmkindikter óte kóp. Qazirgi tańda bokspen aınalysyp júrgen qyzdarymyzdyń qatary qalyń. Endi, mine Nazym Qyzaıbaıǵa qarap boı túzegisi keletin jastarymyz sany artpasa kemimeıdi dep oılaımyn. Nazym qazaq qyzdaryna bokstyń ozyq úlgisin kórsete bildi.

— Jalpy, ózińiz bas bapkerlikke kelgen az ǵana ýaqytta eńbegińiz aqtaldy dep oılaısyz ba?

— Bizdiń qyzdar Olımpıadada jaqsy jekpe-jekter kórsetti dep sanaımyn. Al eńbegimizge baǵa beretin halyq.