Men úshin polıtsııa barlyq ýaqytta adaldyq pen ádildiktiń etalony sanaldy - Aınur Sársebaeva
NUR-SULTAN. QazAqparat - Krımınalıst syrt kózge qarapaıym mamandyq tárizdi kóringenimen, ony ıgerý ár adamnan tynymsyz izdenisti, únemi bilimin jetildirip otyrýdy talap etedi. Sebebi, bilikti krımınalıst bolý úshin ǵylymnyń ár salasynan habardar bolyp qana qoımaı, basqa da mamandyqtardy bir kisideı ıgerýiń kerek. Osyndaı kúrdeli mamandyqty ıgergen názik jandardyń biri QR Іshki ister mınıstrligi jedel krımınalıstıka departamentiniń bas krımınalısi - Aınur Sársebaeva.
Aqtóbe oblysynyń Shalqar qalasynda kóp balaly otbasynda dúnıege kelgen Aınur Qojageldiqyzy orta mektepti erekshe úlgidegi attestatpen bitirgennen keıin Q.Jubanov atyndaǵy Aqtóbe memlekettik pedagogıkalyq ınstıtýtynda qazaq tili men ádebıeti mamandyǵy boıynsha bilim aldy. Qaraǵandy ekonomıka ýnıversıtetinde zańger mamandyǵy boıynsha bilimin shyńdaıdy. Eńbek jolyn Aqtóbe zań kolledjinen bastap, keıin Іshki ister mınıstrliginiń Memlekettik tildi damytý departamentinde qarapaıym ınspektordan bólim bastyǵy laýazymyna deıingi joldan ótti.
«Men úshin polıtsııa barlyq ýaqytta da adaldyq pen ádildiktiń etalony sanaldy. Dál osy jaıt mamandyq tańdaýyma áser etti. Mundaı tańdaýyma barlyq ýaqytta ádil bolyp, muqtaj jandarǵa kómek kórsetýdi úıretken ákemniń de tálim-tárbıesi óz áserin tıgizgeni sózsiz. Buǵan qosa, 30 jyldan bastam boıy ishki ister júıesinde eńbek etip, búginde zeınetke shyqqan úlken aǵalarymnyń da yqpaly bolǵany bar. Ápkem de áskerı qyzmette. Іzimizdi inilerimiz jalǵap keledi», - deıdi keıipkerimiz.
Mınıstrliktiń Memlekettik tildi damytý departamentinde 6 jyl tapjylmaı jumys istegen Aınur Sársebaeva 2010 jyly qyzmetin aýystyryp, krımınalıst bolýǵa sheshim qabyldaıdy. Ýnıversıtetten alǵan fılolog mamandyǵy fonoskopııa salasyndaǵy krımınalıst maman bolýyna zor múmkindik bererine senimdi edi. Senimi aldaǵan joq. Vıdeofonoskopııalyq zertteý óndirisine quqyq beretin kýálik alǵannan keıin de Aınur Qojageldiqyzy krımınalıstıka ǵylymy boıynsha bilimin odan ary shyńdap, krımınalıstıkalyq jáne arnaýly zertteýlerdiń úsh túrinen biliktilik emtıhanyn sátti tapsyryp shyqty. Nátıjesinde QR ІІM Biliktilik komıssııasy oǵan daktıloskopııalyq, polıgrafolııalyq jáne sý qarý-jaraq zertteýine quqyq beretin kýálik berdi.
«Tańdaýyma esh ýaqytta ókingen emespin. Jumysym ózime qatty unaıdy. Krımınalıst jumysy - bul óte qıyn, jaýapkershiligi mol ári kúrdeli jumys. Ol shydamdylyq pen tabandylyqty talap etedi. Krımınalıst qyzmeti tergeý is-qımyldaryn tehnıkalyq-krımınalıstıkalyq qamtamasyz etýge, eń aldymen oqıǵa ornyn qaraý barysynda tanylyp, alynǵan zattaı aıǵaqtarmen odan ary jumys isteýge, zertteý júrgizýge baǵyttalǵan. Birinshi mamandyǵym - fılologııa. Ol qazirgi jumysymda naqty bir tulǵanyń daýysy men sóıleý mánerin naqtylaý maqsatynda júrgiziletin fonoskopııalyq zertteýlerge kóp kómegin tıgizedi», - dedi Aınur Sársebaeva.
Aınur Qojageldiqyzy jumysynda da abroıly. Eńbegi esh ketken emes. Іshki ister mınıstrligi tarapynan alǵys hattarmen, gramotalarmen, «ІІM úzdigi» belgisimen, «Quqyq tártibin qamtamasyz etýde úzdik shyqqany úshin», «Іshki ister organdaryndaǵy minsiz qyzmeti úshin» medaldarymen marapattaldy. 2009 jyly QR ІІM usynysymen elimizdiń Aqparat jáne qoǵamdyq damý mınıstrligi tarapynan «Til janashary» tósbelgisine ıe boldy.
Krımınalıstıka salasynyń bilikti mamanynyń kóp ýaqyty jumysqa ketetini belgili. Alaıda, keıipkerimiz bos ýaqytyn otbasyna arnap, qoly qalt etkende shyǵarmashylyqpen de aınalysqandy jaqsy kóredi. Mýzykalyq aspaptarda oınap, óleń jazady. Qazirgi ýaqytta onyń ata-analaryna arnalǵan «Ómir - ótkelim», «Anam - aq perishtem» atty eki jyr jınaǵy jaryq kórgen.
«Kóptegen adamda polıtsııa qyzmetkerleri jaıynda olardy qatal, shyǵarmashylyqtan jurdaı degen túsinik qalyptasyp qalǵan. Munymen múldem kelispeımin. Polıtsııa qyzmetkerleri arasynda ádem sýret salyp, án aıtatyn, óleń jazatyn shyǵarmashylyq adamdary óte kóp. Qaýyrt jumys kúninen keıingi meniń súıispenshiligim poezııaǵa aýady. Allanyń bergen bul syıy osydan 16 jyl buryn ómirden ozǵan ákemnen daryǵan shyǵar. Ómirdegi jan tebirenterlik sátterimdi aq paraqqa óleń joldarymen túsirip otyramyn. Túnde ne bolmasa uıqyǵa jatar aldymda shabytym keletini bar. Birinshi kitapbym marqum ákeme arnalǵan. Ótken jyly anamnyń 80 jyldyq mereıtoıy boldy. Balalarynyń barlyǵy týǵan qalamyz Aqtóbede, al men elordada turyp jatyrmyn. Sondyqtan erekshe tosynsyı jasaǵym keldi. Ekinshi kitabymdy 3 aı boıy jumystan kelgennen keıin kún saıyn jazyp shyqtym. Bul kitapanamnyń týǵan kúninen bastap osy ýaqytqa deıingi ǵumyrynan syr shertedi», - dedi Aınur Qojageldiqyzy.
Aınur Sársebaeva analyq mahabbatyn ulyna arnady. Onyń elin súıer azamat bolyp, bilikti maman atanýy úshin baryn saldy. Búginde Nur-Sultan qalasyndaǵy medıtsınalyq ýnıversıtette bilim alyp jatqan uly bilikti dáriger bolǵysy keledi.
«Áıel - bul otbasy oshaǵynyń uıytqysy. Olardyń ıyǵyna balalaryna qamqorlyq kórsetip, tálim-tárbıe berý, otbasynda jaıly jaǵdaı jasaý, kásibı qyzmette zor jetistikterge jetýmen qatar ádemi, sulý bolyp qalý júktelgen. Búgingi Halyqaralyq áıelder kúninde barlyq áriptesterimdi, barlyq názik jandardy kóktemniń osynaý tamasha kúnimen quttyqtaımyn. Olarǵa myqty densaýlyq, mahabbat pen súıispenshilik tileımin!» - dedi ol.
