Men úshin Memleket basshysymen bir kúnde Premer-Mınıstr qyzmetine kirisý - úlken mártebe - QR Premer-Mınıstri K.Másimov
ASTANA. 8 sáýir. QazAqparat /Aıdar Ospanalıev/ - «Men úshin Memleket basshysymen bir kúnde Premer-Mınıstr qyzmetine kirisý úlken mártebe»,- dedi búgin QR Parlamenti Májilisinde palata depýtattary QR Premer-Mınıstri laýazymyna kandıdatýrasyn taǵaıyndaýǵa kelisimderin bergennen keıin sóılegen Qazaqstannyń segizinshi Úkimetiniń basshysy Kárim Másimov.
«Búgin Prezıdent meni qaıtadan Úkimet basshysy laýazymyna taǵaıyndady. Men úshin bul - úlken mártebe. 2007 jyldyń qańtar aıynda men alǵash ret Premer-Mınıstr bolyp taǵaıyndaldym. Sonda men ózimniń qandaı laýazym ıesi bolsam da Prezıdenttiń senimdi kómekshisi bolatynymdy aıtqanmyn. Men búgin osy sózimdi taǵy qaıtalaǵym kelip otyr», - dedi K.Másimov.
Sondaı-aq ol óziniń Prezıdent senimine ıe bolýǵa quqyly ekenin is júzinde dáleldeıtindigin atap ótti. «Men sonymen qatar depýtattarǵa da, «Nur Otan» partııasynyń ókilderine de alǵysymdy bildiremin. Bizdiń osyǵan deıingi birlesken qımyldarymyz nátıjeli boldy. Óıtkeni ol ister birlesken túrde júzege asyryldy. Biz sizdermen kóptegen keńester ótkizdik. Nátıjesinde bizdiń birlesken qımyldarymyz dál kelip otyrdy. Bul óz kezeginde alda turǵan mindetterdi talapqa saı sheshýge yqpal etti», - dedi Úkimet basshysy.
