Men úshin altynnan kem emes: Dımash Qudaıbergen Olımpıada jeńimpazdaryn quttyqtady

NUR-SULTAN. QazAqparat – Tanymal ánshi Dımash Qudaıbergen Tokıo Olımpıadasynda júlde alǵan qazaqstandyq sportshylardy jeńisimen quttyqtady, dep habarlaıdy QazAqparat.

«Jeńisterińiz úshin úlken rahmet, baýyrlar! Eldiń namysy úshin tyrysyp, eńbekpen ákelgen qola júldelerińiz, men úshin altynnan kem emes! Alla qalasa budan da úlken shyńdardy baǵyndyrýǵa násip etsin!», - dep jazdy D. Qudaıbergen Instagram paraqshasynda.

Buǵan deıin Tokıo -2020 jazǵy Olımpıada oıyndaryna sholý jasaǵan bolatynbyz. Atalǵan básekede Qazaqstan atynan 97 sportshy básekeniń 28 túrinen baq synady. Nátıjesinde el quramasy 8 qola medalmen 83-shi orynǵa turaqtady.

Al dál qazir aıtýly sporttyq sharanyń jabylý saltanaty ótip jatyr.