Ulymnyń jeńiske jetetinine sendim – Aıdos Sultanǵalıdiń ata-anasy balasynyń jeńisi týraly

ASTANA. KAZINFORM — Araǵa 26 jyl salyp grek-rım kúresinen álem chempıonatynda Qazaqstannyń ánurany shyrqaldy.

Álem chempıonynyń jeńisi týraly Aıdos Sultanǵalıdiń ata-anasy Sultanǵalı Keýlimjaev pen Apıza Samılova ishki tolqynysymen bólisti.

— Qazir qandaı sezimde ekenimizdi sózben aıtyp jetkizý qıyn. Qalyń elim — qazaǵym qalaı ýaıymdasa, biz de solaı taqymymyzdy qysyp otyrdyq. Alladan duǵa jasap, kúni-túni tiledik. Sol tilekterdi Alla qabyl etip, balamyz jeńiske jetti, — deıdi ákesi Sultanǵalı Keýlimjaev Jibek Joly arnasynyń «Búgin LIVE» baǵdarlamasynda bergen onlaın suhbatynda.

Ákeniń aıtýynsha, Aıdos bul jeńiske ońaı jetken joq. Buǵan deıin halyqaralyq dodalardan qola júldeler alyp júrgen.

— Men ulymnyń jeńiske jetetinine sendim. Qazir barynsha shynyǵyp, tájirıbe jınaǵan kezeńi ǵoı. Dese de, barǵan balýandardyń bári — «sen tur, men ataıyndar». Júrektiń túkpirinde kúdik te boldy, alaıda úmit pen senim qatar turdy. Ulymdy ár saparǵa áýejaıǵa deıin aq batamen shyǵaryp salamyn. Al úıge kelgen soń, kún-túni tileýin tileımin, — deıdi ol.

Al Apıza Samılova da balasynyń jekpe-jekterin nazardan tys qaldyrmaǵan.

— Kúresin kórdim, biraq tájik balamen shyqqan jekpe-jegin kóre almadym. Ol buǵan deıin bir jeńip, bir jeńilgen qarsylasy edi. Óte myqty bala ekenin bilemin. Sondyqtan duǵa etip, kelesi bólmede júrdim. Al fınaldy 6 mınýt kóremiz dep kútkenbiz, biraq bári qas-qaǵym sátte sheshilip ketti, — deıdi anasy.

Ol kez kelgen ata-anaǵa sabyr men tózim kerektigin, ásirese sport jolyn tańdaǵan balaǵa qoldaý asa mańyzdy ekenin jetkizdi.

— Biz bul balany kishkentaıynan sportqa arnap qoıdyq. Artyq dúnıemen mıyn aýyrtpaımyz. Artyq habarlaspaımyz da. Bala ýaqytyly demalýy kerek, — deıdi Apıza Samılova.

Aıdos Sultanǵalı sportqa 2-synyptan bastap qatysa bastapty.

— Qyzylordada Ǵabıdın esimdi jattyqtyrýshysy bar edi. Keıin Petropavlǵa bir jarysqa bardy. Sol kezde sondaǵy bapkerler Aıdostyń boıyndaǵy talantty birden baıqap, mektepterine shaqyrypty. Ǵabıdın aǵaı meni shaqyryp alyp: «Aǵa, úsh aı oılanyńyz, balany sol jaqtaǵy mektep-ınternatqa beresiz be?» dedi. Men esh oılanbastan birden kelisim berdim. Óıtkeni men balamdy sol dodaǵa arnap otyrǵan adammyn. Internatta Seraly, Meıram degen bapkerleri boldy. Aıdos ol jaqta úlken tájirıbe jınady. Ol tek jeke jetistikke jetip qana qoımaı, búkil Petropavldyń namysyn qorǵap, Qazaqstan boıynsha óńirdi birinshi orynǵa shyǵardy, — deıdi chempıonnyń ákesi.

Sultanǵalı Keýlimjaev balasyn eshqashan úı tirligine jumsamaıtynyn, tek sportqa tolyq den qoıýǵa jaǵdaı jasaǵanyn jetkizdi.

— Balam keıde kómekteskisi kelip turady. Biraq men: «Bul tirshilik bitpeıdi, sen tek alǵan betińnen qaıtpa. Jeńiske jetýge tyrys» dep arqasynan qaǵyp qoıamyn. Anasy da solaı deıdi, — deıdi ol.

Aıta keteıik, Memleket basshysy grek-rım kúresinen álem chempıony Aıdos Sultanǵalıdy quttyqtady.