Men tonaý men kúsh kórsetýge qarsymyn – Dınara Sátjan

NUR-SULTAN. QazAqparat – Tanymal qazaqstandyq telejúrgizýshi jáne kásipker Dınara Sátjan Qazaqstanda bolyp jatqan jaǵdaıǵa baılanysty pikir bildirdi, dep habarlaıdy QazAqparat.

«Osy kezde Almaty ákimdigi janyp jatyr. Qalaǵa janyń ashıdy, adamdar úshin qorqasyń. Bılik halyqtyń talap-tilegine qulaq asty. Premer otstavkaǵa ketti. Prezıdent shuǵyl sharalar qoldanyp jatyr. Kópshilik bárinen sharshady, árıne. Biraq men tonaý, kúsh kórsetý sııaqty áreketterge qarsymyn»,-dep jazdy ol Instagram paraqshasynda.

Sonymen qatar Dınara Sátjan halyqtyń aldyna qoryqpaı shyqqan Qyzylorda oblysy ákiminiń batyldyǵyna tánti bolǵanyn jetkizdi.

Aıta keteıik, Nur-Sultan, Almaty qalalary men Almaty jáne Mańǵystaý oblystarynda tótenshe jaǵdaı engizildi. QR Prezıdenti Qasym-Jomart Toqaev Úkimettiń otstavkasyn qabyl alyp, eldegi jaǵdaıdy turaqtandyrý jóninde tapsyrma berdi. Sonyń ishinde suıytylǵan gazdyń baǵasyn 180 kúntizbelik kúnge ýaqytsha retteý sharasy da bar.