Men taǵdyrdyń soqqysyn qabyldaımyn, biraq ony túsine almaımyn - E. Shákeev
ALMATY. QazAqparat - Men taǵdyrdyń soqqysyn qabyldaımyn. Biraq ony túsine almaımyn. Bul aqylǵa syımaıdy.
Búgin Almatyda uly Safar Shákeevti aqtyq saparǵa shyǵaryp salýǵa baılanysty ótken qaraly jıyn barysynda Erkesh Shákeev osylaı dedi.
Ol ózin syrttaı barynsha baısaldy ustaýǵa tyrysqanymen, ishteı «ah» uryp, ózegi órtenip, kóp suraqtarǵa jaýap izdep, sharq urǵany sezilip turdy. Birese ózin aqtaǵandaı, birese, ulynyń rýhy aldyna keshirim suraǵandaı áser qaldyrdy.
«Men negizi tabandy adammyn. Taǵdyrdyń bul soqqysyn qabyldaımyn, biraq ony túsine almaımyn. Bul aqylyma sımaıdy. Bul jalǵanda jer basyp, tiri júrgen kezińde perzentińnen aırylǵannan asqan qasiret joq. Men óz basym, «eshkimdi renjitpeı, eshkimniń ala jibin attamaı, eshkimge qııanat jasamaı taza ómir súrip jatyrmyn, mundaı qasiretke ushyramaspyn» dep oılaıtynmyn. Amal qansha!? Safar mezgilsiz qazaǵa ushyrady. Ol mezgilsiz ýaqytta, barmaıtyn jerge kezdeısoq baryp, opat boldy.
Biz bir-birimizdi jaqsy túsinetinbiz. Kóp sóılesetinbiz. Onyń jospary kóp bolatyn. Safar adamdarǵa erekshe meıirimmen qaraıtyn jan edi. Men bir joly oǵan: «Endi 1000 adamnyń ishinen bir adam saǵan renjise, eshteńe ete qoımas» - dep edim, ol: «Áke, bir adam degen bul óte kóp qoı», - dep jaýap bergeni bar. Óte ókinishti. Ómirdi ózińe beıimdeı almaısyń. Ómirge beıimdelýińe týra keledi. Ómir óz zańdylyǵymen jyljıdy. Endi, sizderge aıtarym, balalaryńyzdy qorǵaı bilińizder. Balalaryńyz shyn dos arttyrýlary úshin, adam tanı bilsin. Men Safarmen qoshtaspaımyn. Bul jóninde meniń óz josparym bar. Núktesin qoıatyn jáıtter bar. Barlyǵyńyzǵa rahmet», - dedi E. Shákeev.
