Men seni adam tanymastaı etemin: Shymkentte burynǵy áıeline qyshqyl tókken kúdikti ustaldy
ShYMKENT. KAZINFORM — Shymkentte burynǵy áıelin ańdyp, ústine qaýipti hımııalyq suıyqtyq tókken er adam ustaldy. Aýyr kúıik alǵan áıel aýrýhanaǵa jatqyzyldy.
«NeMolchıKZ» quqyq qorǵaý qorynyń habarlaýynsha, erli-zaıypty shamamen bes jyl buryn, bala dúnıege kelgennen keıin ajyrasqan. Er adam burynǵy áıeliniń atyna nesıe rásimdep, alıment tóleýden jaltarǵan. Áıeldi ańdý úshin ol jańa telefon nómirin satyp alyp, ózin klıent retinde tanystyryp, onyń sulýlyq salonyna jazylǵan.
Aldyn ala málimet boıynsha, kúdikti kezdesýge arnaıy kıim kıip, kanıstrmen kelgen. Ol áıeldiń ústine qyshqyl tógip, «Men seni adam tanymastaı etemin» degen. Áıeldiń aıtýynsha, suıyqtyq onyń kıimin birden kúıdirip jibergen. Qazir áıel aýrýhanada em qabyldap jatyr. Oǵan birneshe kúrdeli ota jasap, teri aýystyryp salý qajet.
Shymkent qalasy polıtsııa departamenti rezonans týdyrǵan oqıǵaǵa qatysty pikir bildirip, kúdiktiniń ustalǵanyn rastady.
— 2 tamyzda dene jaraqattarymen Shymkent qalasynyń turǵyny aýrýhanaǵa jetkizildi. Anyqtalǵandaı, burynǵy kúıeýi kezdesýge aldap shaqyryp, áıeldiń ústine suıyqtyq tógip, oqıǵa ornynan qashyp ketken. Bul fakti boıynsha qylmystyq is qozǵaldy, — dep habarlady vedomstvo.
Polıtsııa qylmystyq is boıynsha kúdiktiniń jedel túrde anyqtalyp, basqa óńirde ustalǵanyn naqtylady.
— Polıtsııa qyzmetkerleri kúdiktini sol kúni-aq anyqtap, Almaty qalasynda ustady. Qazirgi ýaqytta ol kúzetpen qamaýda otyr. Tergeý barysy polıtsııa departamenti basshylyǵynyń baqylaýynda, — delingen polıtsııa habarlamasynda.
Buǵan deıin Shymkentte turmystyq zorlyq-zombylyq isteri bir táýlikte sotqa jiberilip jatqany týraly habarlaǵan edik.
