Men referendýmdy ótkizý týraly shyǵysqazaqstandyqtardyń úndeýin ardagerlerdiń qoldaıtyndyǵyna kúmándanǵan joqpyn - Q. Súleımenov
ASTANA. 21 qańtar. QazAqparat /Aıdar Ospanalıev/ - «Men shyǵysqazaqstandyq ardagerlerdiń Memleket basshysynyń ókilettigin uzartý jónindegi referendýmdy ótkizý týraly úndeýiniń ózge ardagerler tarapynan qoldaý tabatyndyǵyna kúmándanǵan joqpyn»,-dedi Respýblıkalyq ardagerler keńesiniń tóraǵasy Qaıyrbek Súleımenov. Bul týraly ol búgin «Qazaqstan Respýblıkasy ardagerler uıymy» qoǵamdyq birlestiginiń Ortalyq keńesiniń kezekti plenýmynda aıtty.
«Bizdiń ardagerler, uıymymyzda tirkelgen 1 mıllıon 600 myń ardagerler men zeınetkeler, úndeýdi qoldaıtyndyqtary belgili. Biz osy ýaqytta barlyǵymyz birigip, Konstıtýtsııalyq keńestiń sheshimin kútýdemiz. Eń bastysy biz Elbasy Nursultan Nazarbaevtyń sheshimin kútemiz. Eger ol referendým ótkizý qajet dep tapsa, elimizdiń ardagerleri men zeınetkerleri Memleket basshysyna daýys beredi dep nyq senimmen aıta alamyn. Óıtkeni táýelsizdik ornaǵan 20 jyl ishinde barlyǵymyz Prezıdentimizdiń óte ońdy ishki jáne syrtqy saıasat júrgizip otyrǵandyǵynyń kýási bolyp otyrmyz»,-dedi Ardagerler keńesiniń tóraǵasy.
Onyń pikirinshe, zeınetkerler ómirdiń qyzyǵy men qıyndyǵyn birdeı sezinip, onyń aq-qarasyn ajyratyp, úlken tájirıbe jınaqtaǵan halyq. Olardyń kópshiligi tipti Uly Otan soǵysyna da qatysqan. Taǵy bir bóligi soǵystan keıingi jyldardaǵy qıyndyqtardy bastan ótkerdi. «Al men Keńes Odaǵy ydyraǵannan keıingi ekonomıkamyzdy qalpyna keltirý jolyndaǵy máselelerge aralastym. Qoryta kelgende, bizdiń ardagerler aıtpaqshy «Biz ózimizdiń jáne balalarymyzdyń taǵdyryn tek Nazarbaevqa ǵana senip tapsyra alamyz», -dedi Q.Súleımenov.
