Men referendým ótkizý jónindegi bastamany birden quptadym - Ákim Tarazı
ASTANA. 29 jeltoqsan. QazAqparat /Aıdar Ospanalıev/ - «Men Nursultan Nazarbaevtyń Prezıdenttik ókilettigin uzartýǵa qatysty referendým ótkizý jónindegi bastamany birden quptadym», -
dedi Memlekettik syılyqtyń laýreaty, jazýshy Ákim Tarazı. Bul týraly ol búgin Astanada «Alǵashqy Prezıdent - Ult kóshbasshysy, Qazaqstannyń turaqty damýynyń kepili retinde» atty dóńgelek ústel otyrysynda aıtty.
«Bizge búgin taǵy da saılaý ótkizip, áýre-sarsańǵa salynǵansha osy referendýmdy uıymdastyra qoıǵan áldeqaıda jeńil. Onyń ústine búgingi Elbasymyzdy almastyra qoıatyn basshy da tabyla qoımaıdy. N.Nazarbaev Keńes Odaǵynyń tusynda da elimizdi basqarǵan azamat. Biz Prezıdentimizdiń arqasynda ótpeli kezeńniń qanshama qıyndyqtaryn eńsere aldyq. Al ol ýaqyttaǵy qıyndyqtardy jeńý ekiniń biriniń qolynan kele bermeıtin is edi. Biz ol kezde dalada qalǵan eldeı kúı keship júrdik. Reseıden bólingennen keıin bizde ne óndiris, ne ekonomıka bolmady. Sonyń barlyǵynan ótý ońaı sharýa emes, árıne. Al osy qıyndyqtardy 19 jyldyń ishinde jeńip shyǵý tek daryndardyń qolynan keletin is. Ol tarıhta bolmaǵan jaǵdaı»,- dedi Á.Tarazı.
Onyń pikirinshe, elde referendým týraly sóz qozǵaǵanda, qyzyl sózge elitip, asyra siltep jiberetinder kóbeıip ketti. Olardyń keıbiri "Memleket basshysynyń ókilettigin 2030 jylǵa deıin uzartý kerek" degen syńaıdaǵy áńgimelerdi aıtady. «Menińshe, biz osydan aýlaq bolǵanymyz durys. Óıtkeni bul aram pıǵyldy adamdardyń eldegi jaǵdaıǵa kúıe jaǵý úshin taptyrmas sebep. Biz referendýmdy ótkizedi ekenbiz, ony retimen uıymdastyrýymyz qajet. Bul bılik basyna kelý úshin Elbasyna jaǵynyp, jaqsy sóz aıtam dep, asyra silteýshierdiń naýqanyna aınalyp ketpeýi kerek»,- deıdi jazýshy.
