«Men Qazaqpyn» jobasy Shyǵys Qazaqstanǵa keldi
ÓSKEMEN. QazAqparat - «QAZAQSTAN» ulttyq arnasynyń «Men Qazaqpyn» halyqaralyq megajobasynyń ekinshi kezeńine irikteý syndary Shyǵys Qazaqstanda bastaldy, dep habarlaıdy QazAqparat tilshisi.
Bul týraly óńirlik «ALTAI» telearnasynyń dırektory Aıda Jabaǵıeva men orynbasary Aıdos Juqanuly arnaıy brıfıngte aıtty.
«Jobaǵa qatysýǵa nıet bildirgenderdiń ónerin telearnanyń, mádenıet jáne ishki saıasat basqarmalarynyń ókilderi, irikteý ótetin aýdandardyń óner maıtalmandary baǵalaıdy. Semeıge jaqyn ornalasqan tórt aýdandy sondaǵy áriptesterimizge tapsyrdyq» - dedi Aıda Jabaǵıeva.
Telearnanyń bas redaktory Aıdos Juqanulynyń aıtýynsha, baıqaýǵa dástúrli án men terme aıtyp, kúı sherte alatyn kez kelgen ónerpaz qatysa alady. Eshqandaı mýzykalyq bilim týraly qujat talap etilmeıdi.
Oblystyq irikteýdiń ózi eki kezeńde ótpek. Áýeli Úrjar, Aıagóz, Zaısan, Tarbaǵataı, Kókpekti, Ulan, Katonqaraǵaı, Kúrshim aýdandarynda qorytyndy synǵa irikteý júrgizilmek. Ol 28 mamyr kúni Úrjar aýdanynan bastaý alady. 30 maýsymda Óskemende ótetin qorytyndy synda respýblıkalyq kezeńge qatysatyn úmitkerlerdi irikteý bolady. Bul kezeńdi oblys jurtshylyǵy «ALTAI» telearnasynan tamashalaıtyn bolady.
