«Men Qazaqpyn» halyqaralyq megajobasynyń ekinshi maýsymyna irikteý kezeńderi bastaldy
ASTANA. QazAqparat - «Qazaqstan» RTRK» AQ-nyń uıymdastyrýymen «Men Qazaqpyn» halyqaralyq megajobasynyń ekinshi maýsymyna irikteý kezeńderi bastaldy, dep habarlaıdy QazAqparat «Qazaqstan» RTRK» AQ-nyń baspasóz qyzmetine silteme jasaı otyryp.
«Bıyl «Men Qazaqpyn» jobasyna elimizdiń 14 aımaǵynan 180-ge jýyq aýdan ortalyqtary men aýyldarynda irikteý kezeńderi ótetin bolady. Aýdandyq irikteýden ótken jeńimpazdar oblystyq baıqaýǵa ótip, baq synasady. Ulttyq arnanyń aýqymdy jobasyna korporatsııanyń aımaqtardaǵy fılıaldary belsene atsalysýda. Alǵashqy irikteý kezeńderi Áýlıekól, Altynsarın eldi mekenderi men Qostanaı qalasynda ótti», - dep atap ótti teleradıokorporatsııasynda.
Jobanyń maqsaty - elimizdiń túkpir-túkpirindegi dástúrli ánshi-termeshi, kúıshilerdiń basyn bir arnada toǵystyryp, elimizdiń ár aımaǵynda qalyptasqan óner mektepteriniń tańdaýly týyndylaryn dáripteý, tól ónerimiz - kúı, jyr-termeni damytyp, zamanǵa saı jańashalandyryp, óskeleń urpaqqa nasıhattaý.
Іrikteý kezeńderi maýsym aıynyń sońyna deıin jalǵasady. Baıqaýǵa qazaq kompozıtorlarynyń jáne halyq ánderin dombyra, qobyz, syrnaı aspaptarynyń súıemeldeýimen oryndaıtyn 18 ben 40 jas aralyǵyndaǵy ónerpazdar qatysa alady.
Aıta keteıik, QR Aqparat jáne kommýnıkatsııalar mınıstrliginiń qoldaýymen «Qazaqstan» RTRK» AQ 2017 jyly «Men qazaqpyn» atty halyqaralyq televızııalyq megajobasyn alǵash ret júzege asyrǵan bolatyn. Ótken jyly bul jobaǵa 3000-nan astam úmitker ótinish bildirip, oblystyq irikteýge 700-deı adam qatysty. Al, Astanada ótken televızııalyq jobada 57 ónerpaz baq synady. Sondaı-aq, Qytaı, Reseı, Mońǵolııa elderinde turatyn qandastarymyz da óz ónerlerin kórsetýge múmkindik alǵan bolatyn.
