Men para bergen joqpyn - Almaty Densaýlyq saqtaý basqarmasynyń eks-basshysy
Búgin basty sot talqylaýynda Serikbol Mýsınovqa tekserý organdarynyń laýazymdy tulǵalaryna 15 myń AQSh dollary kóleminde para bergeni týraly aıyp taǵyldy.
Daýly iske basqarmanyń eks-basshysy men onyń eki qyzmetkeri qatysy bar bolyp shyqty.
«2018 jyly 20 tamyzda qalalyq Densaýlyq saqtaý basqarmasynyń memlekettik satyp alý jáne ákimshilik quqyqtyq jumystar bóliminiń basshysy Serikpaev óziniń tanysyna telefon soǵyp, prokýratýra organdarynyń tekserýge kele jatqanyn aıtqan. Sheneýniktiń telefon syrtyndaǵy tanysy tekserýshi organda tanysy baryn, kez-kelgen máseleni sheship beretinin aıtqan. Serikpaev Almaty prokýratýrasynyń qyzmetkerlerine aqsha berip qutylýdy oılastyrǵan. 2018 jyly 13 qyrkúıekte Serikpaev ózi jáne basqarma basshysy Mýsınovtyń atynan prokýrordyń qyzmetin jalǵan atqaryp otyrǵan Mamyshevke para bergen. 14 qyrkúıekte Serikpaev Bostandyq aýdandyq prokýratýrasyna kelip, Serikbol Mýsınovtyń tapsyrmasymen kelgenin aıtyp, ár prokýrorǵa 5 myń AQSh dollarynan, ıaǵnı 15 myń AQSh dollaryn beretinin aıtqan», - dedi aıyptaý aktisin oqyǵan prokýror Aıbek Sabyrbaev.
Aıyptaý aktisine sáıkes, revızorlar ótken jyldyń da qorytyndysyn tekseretinin habarlaǵanda, para somasy odan da kóbeıgen.
«Basqarma basshysy tek 2018 emes, 2016-2017 jyldardaǵy qyzmeti de tekseriletinin bildi. Sosyn Serikpaev basqarmanyń dárilik, materıaldy tehnıkalyq bóliminiń basshysy Boranbaevanyń kabınetinde otyryp, oǵan da qylmystyq pıǵyly týraly aıtyp bergen. Bul tulǵalar tekserýshi organ ókilderine 25 myń AQSh dollaryn berý týraly sheshimge keledi. Odan soń Boranbaeva Mýsınovqa prokýratýramen keliskenin aıtyp, josparlarymen bólisken», - dedi prokýror.
Aqshany prokýrorlarǵa Serikpaev pen Boranbaeva bergen.
Serıkbaev Mamyshevke - 20 myń AQSh dollaryn, Boranbaeva 5 myń AQSh dollaryn bergen.
Qalalyq Densaýlyq saqtaý basqarmasynyń burynǵy basshysy óziniń aıybyn moıyndamady.
«Prokýrordyń taqqan aıybyn moıyndamaımyn. Meni aýyr qylmysta kúdikti dep tanýǵa qandaı negiz bar? Men qylmys jasaǵan joqpyn. Sot barysynda ol dáleldenedi dep senemin», - dedi Serikbol Mýsınov.
Eske salaıyq, Densaýlyq saqtaý basqarmasynyń burynǵy basshysy Serikbol Mýsınovqa qatysty para berdi degen kúdikpen is qozǵalǵan bolatyn.
Basqarma basshysy qyzmetinen 2018 jyly 20 qyrkúıekte bosatyldy.
Ol qalalyq basqarmany 2017 jyldyń qarashasynan beri basqaryp kelgen edi. Qyzmet jolyn Shyǵys Qazaqstan oblysy Aıagóz aýdandyq aýrýhanasynda ıntern-dáriger bolyp bastaǵan. Ár jyldary Semeı oblysy Densaýlyq saqtaý basqarmasynyń basshysy, Astana qalasy Farmatsevtıkalyq baqylaý basqarmasynyń basshysy, Mańǵystaý oblysy Densaýlyq saqtaý basqarmasynyń basshysy qyzmetterin atqarǵan.
