Men ózimdi osy jumysqa arnaǵan adammyn jáne Qazaqstannyń alǵa ilgerileýi úshin bárin jasaıtyn bolamyn - N. Nazarbaev
ASTANA. QazAqparat - Elbasy Nursultan Nazarbaev Qazaqstan halqynyń birligi kúnin merekeleýge arnalǵan saltanatty is-sharaǵa qatysty.
Bul týraly Aqordanyń baspasóz qyzmetinen habarlady.
«Nurly jol - jeńis joly» atty merekelik shara elordanyń «Qazaq eli» monýmenti aldyndaǵy alańda ótti.
Memleket basshysy Qazaqstan halqyn merekemen quttyqtap, ótken saılaýda el azamattary kúsh-jigeri men birligin búkil álemge tanytqanyn atap ótti.
«Kótetnosty halyqtyń tutastyǵy men turaqtylyǵy arqasynda Qazaqstan zor tabystarǵa jetti. El aldynda turǵan mindetterdi oryndaý úshin birlikti saqtaý kerek», - dedi Nursultan Nazarbaev.
Qazaqstan Prezıdenti sondaı-aq kórsetken senimi men qoldaýy úshin barsha halyqqa alǵysyn bildirdi.
«Meni qoldaǵan barlyq qazaqstandyqtarǵa alǵys aıtqym keledi. Maǵan osy kúnderi elimiz ben álemniń san tarapynan, túrli sala ókilderinen myńdaǵan quttyqtaý hattar men jedelhattar, telefon qońyraýlary kelip túsýde. Bárine úlken rahmet aıtamyn. Osyndaı halyqqa qyzmet etý - uly mártebe. Men ózimdi osy jumysqa arnaǵan adammyn jáne Qazaqstannyń alǵa ilgerileýi úshin, bizdi búkil álem qurmetteýi úshin jáne el aldynda turǵany mindetterdi tabysty júzege asyrý úshin bárin jasaıtyn bolamyn. Biz muny eldiń jáne bolashaq urpaqtyń aldyndaǵy paryzymyzdy oryndadyq dep aıtý úshin atqarýǵa tıispiz», - dedi Memleket basshysy.
Sońynda Nursultan Nazarbaev barsha qazaqstandyqtarǵa baq-bereke jáne tabys tiledi.
***
Merekelik shara aıasynda kontserttik baǵdarlama ótip, oǵan Qazaqstannyń estrada juldyzdary, elordalyq jáne óńirlik etnomádenı birlestikter ókilderi, sondaı-aq respýblıkanyń shyǵarmashylyq ujymdary qatysty.
Alań aýmaǵynda etnoaýyl qurylyp, elordanyń ǵana emes, eldiń basqa qalalarynyń da etnomádenı birlestikteri óz ultynyń mádenıetin, bolmysyn, dostyq dástúri men qonaqjaılyǵyn pash etti.
