Men óz jumysymnan lázzat alamyn - almatylyq shıpajaı qyzmetkeri
Almatyda óz isine adal ári ony abyroımen atqaryp júrgen azamattar bar. Olardyń biri «Almaty Resort» emdeý-saýyqtyrý kesheniniń qyzmetkeri Sabına Baısultanova, dep habarlaıdy Kazinform tilshisi.
Keıipkerimiz búgingi kúni atalmysh shıpajaıdyń ornalastyrý jáne qyzmet kórsetý bóliminiń bas menedjeri bolyp eńbek etedi.
"Men 2010 jyly T.Rysqulov atyndaǵy Qazaq ekonomıkalyq ýnıversıtetiniń Týrızm mamandyǵy boıynsha oqyp, bitirdim. JOO-nyń 4-shi kýrs stýdenti bolǵan kezimde Intercontinental qonaq úıinde tájirıbeden óttim. Onda tájirıbe óte júrip, osy shıpajaı týraly estidim jáne ary qaraı onda jumysqa turý úshin meni áńgimelesýge shaqyrdy. Ýnıversıtet bitirip, sol áńgimelesýge baryp, odan sátti óttim. Osylaısha 2010 jyldyń qyrkúıek aıynan bastap shıpajaıda eńbek jolym bastaldy. Eń alǵash qyzmetimdi resepshnde tirkeýshi bolyp bastadym. 2011 jyly ákimshi (admınıstrator) laýazymyna aýystym. 2012 jyly aǵa ákimshi boldym. 2019 jyldan beri shıpajaıdyń bas menedjeri qyzmetin atqaryp kelemin", - deıdi Sabına Baısultanova.
Ol bul jumysy ózine qatty unaıtynyn, tipti, bolashaqta basqa qyzmetke aýysý týraly oıy joq ekenin aıtty.
"Munda ártúrli adamdarmen jıi aralasasyń. Qyzyqty sátter de kóp bolady. Bizdiń shıpajaıǵa qarapaıym ári elge tanymal adamdar da kelip jatady. Mysaly, jyl saıyn bizge belgili kıno jáne teatr akteri, halyq ártisi Asanáli Áshimov kelip, demalyp ketedi. Biz osyndaı tulǵalardy kútip alyp, olarǵa barlyq jaǵdaıyn jasaýǵa atsalysamyz. Odan bólek, shetelden keletin qonaqtarymyz bar. Keıbir kezde kelgen qonaqtar jumysymyzdy ary qaraı qalaı damytýǵa bolatyny týraly usynys, eskertýlerin aıtady. Sheteldegi shıpajaılarmen salystyrady. Biz oǵan túsinistikpen qaraımyz. Jalpy, men óz jumysynan lázzat alatyn adamnyń birimin", - deıdi ol.
Sanatorıı 1967 jyldan beri jumys istep keledi. 2008 jyly rekonstrýktsııaǵa jabylyp, eki jyldan keıin qaıta ashylǵan.
"Shıpajaıda jalpy 135 nomer bar. Onyń ishinde 109 standart, 18 eki bólmeli lıýks, 7 úsh, tórt bólmeli VIP lıýks jáne 1 – tórt bólmeli prezıdenttik nomer bar. Shıpajaı barlyǵy 7 bloktan turady. Úsh jatyn, ákimshilik, medıtsınalyq, sporttyq saýyqtyrý korpýstary bar. Shıpajaıǵa bir jylda shamamen 7,5 – 8 myń adam emdelýge keledi. Sondaı-aq jylyna 800-deı bala ata-analarymen birge keledi. Biz 3-14 jas arasynda balalardy da qabyldaımyz. Bizde bir adam 7-10 kúnniń arasynda em qabyldaıdy. ıAǵnı, qonaqtarymyz 7-10 kúndeı bizde jatyp ketedi. Shıpajaıǵa aqyly túrde joldamany mekemeniń brondaý bólimine habarlasyp, tegin joldamany MÁMS arqyly alýǵa bolady", - dedi keıipkerimiz Sabına Baısultanova.
Emdeý ońaltý bóliminiń meńgerýshisi Roza Jýsýpova shıpajaıda tamasha jabdyqtalǵan fızıo, sýmen, balshyqpen emdeý bólmeleri bar ekenin aıtty. Barlyq qyzmet túrleri júrek-qantamyr júıesi, nerv, nesep-jynystyq, súıek-býyn júıeleriniń aýrýlary, tynys alý, as qorytý músheleriniń aýrýlary kezinde ońaltý is-sharalarynyń keshenin júrgizýge baǵyttalǵan.
"Shıpajaıda apparattyq fızıoterapevtik emdeý tásilderinen basqa zamanaýı fızıoterapevtik ádister bar. Oǵan elektrmen emdeý, magnıtoterapııa, lazeroterapııa, ıngalıatsııalar, parafınmen emdeý, ishekti sýlaý, qurǵaq jáne sý asty tartý, syrtqy balshyq applıkatsııalary kiretin balshyqpen emdeý, qýystyq, qyzylıektik, dástúrli sý emsharalary: gıdromassajdy, kameralyq jáne mıneraldy vannalar, dýsh emsharalary: Sharko, kaskadty, tsırkýlıarlyq, atpa sý kiredi. Shıpajaıdyń medıtsınalyq ortalyǵy medıtsınanyń sońǵy talaptaryna jaýap beretin fızıoterapııalyq emsharalardyń keńeıtilgen kesheniniń kómegimen aǵzany saýyqtyrýdyń, profılaktıkanyń jáne qalpyna keltirýdiń kóp múmkindikterin usynady.
Munda mıneraldy sýlarynyń qasıetterine negizdelgen túrli emsharalardy alasyz. Oǵan injý vannasy, kómirqyshqyl vannasy, quıyndy vanna (kameralyq), floıtıng vannasy, vıshı dýshy, sharko dýshy, veerli dýsh, tsırkýlıarlyq dýsh, atpa sý dýshy, sý asty dýsh massajy kiredi.
Siz bizde aýrý, kúızelis jáne sozylmaly sharshaý týraly umytasyz, kúsh jınaısyz, jan men tán úılesimin sezinesiz", - dedi «Almaty Resort» emdeý-saýyqtyrý kesheniniń Emdeý ońaltý bóliminiń meńgerýshisi Roza Jýsýpova.
