Men óz qaramaǵymdaǵy adamdarǵa 450 myń teńgeden tóleıtin edim - vıtse-mınıstr Baımoldına
"Bizde qıt etse, bárin bastyqqa jaba salady. Bir nárse istelmeı qalsa, basshylardy jazaǵa tartady. Alaıda belgili bir tapsyrmanyń oryndalýy jetekshige emes, sol tapsyrmany oryndaıtyn, ıaǵnı naqty bir qujatpen aınalysatyn qyzmetkerdiń jumysyna baılanysty. Sol sebepti Eýropanyń memlekettik organdarynda "sarapshy" - ol óte jaýapty qyzmet. "Sarapshy" degen termınniń ózi aıtyp turǵandaı, adam tıisti sheshimdi ózi qabyldap, sol úshin jaýap beredi. Al birinshi basshy memlekettik organnyń strategııalyq máselelerimen aınalysýy qajet. Biz de Eýropa memleketteriniń tájirıbesine birte-birte kelemiz dep oılaımyn. Osy saladaǵy bizdiń de kózqarasymyz ózgeredi degen senim bar", - dedi Baımoldına búgingi baspasóz máslıxatynda.
Al "Memlekettik organdarda jumys isteıtin sarapshy mamandardyń qazirgi jalaqysy Siz aıtyp otyrǵan jaýkershilikpen sáıkespeıdi ǵoı. Osyny qalaı sheshýge bolady?" degen suraqqa vıtse-mınıstr: "Prezıdent te aıtyp otyr ǵoı, memlekettik qyzmetkerlerdiń jalaqylaryn kóterip, olardyń eńbekaqylary kásipkerlerden kem bolmaýy qajet. Oǵan da jetemiz. Mindetti túrde bolady. Sebebi qazirgi kezde memlekettik qyzmet týraly jańa zańdy qabyldadyq. Endi, atalǵan qujatty iske asyrýǵa qajetti normatıvtik aktiler qabyldanady. Men oılaımyn, osy jyldyń ishinde memlekettik qyzmetkerdiń kásibı biliktiligine, qarym-qabiletine qaraı jalaqy mólsherin belgileý júıesi anyqtalady. Sóz joq, qysqartýlar da bolady. Alaıda sonyń esesine basqa qyzmetkerlerdiń jalaqysy kóteriledi. Máselen, men óz departamentimde isteıtin sarapshynyń 450 myń teńge alǵanyn qalaımyn. Sebebi ol kóptegen normatıvtik-quqyqtyq aktilerge saraptama jasaıdy. Ol úshin myqty bilim kerek. Qazir jańadan kelgen sarapshy 70-80-aq myń teńge alyp júr", - dep jaýap berdi.
