Men otbasyma, ózime az qarajat jumsaımyn- Golovkın ashyq suhbat berdi
- Siz bokspen qashannan aınalysasyz?
- 8-9 jasymnan bastap. Іnim ekeýmiz birge bardyq.Biz egiz bolǵandyqtan únemi birge júretin edik.
- Bokspen aınalysa bastaǵan kezde ata-anańyz ne oılady?
- Qýanǵan joq. Qazir olarǵa ne úshin unamaǵanyn túsinip júrmin, sebebi olar meniń fýtbolmen nemese tennıspen shuǵyldanǵanymdy qalady. Ol jaqtaǵy adamdar múldem basqa.
- Siz Qazaqstanda neshe jasqa deıin turdyńyz?
- 22 jasqa deıin
- Siz qazir Los-Andjeleste júrsiz. Qandaı aıyrmashylyq bar?
- Aıyrmashylyq kóp. Eki jaqty salystyryp, birdeńe jaqsy, birdeńe jaman degim kelmeıdi. Ártúrli oryndar, ártúrli adamdar....
- Siz «Kanelo» Alvarespen eki ret aıqastyńyz, endi úshinshi jekpe-jekti qalaısyz. Biraq, trılogııa keıinge qalyp jatyr, sebebi ol eshkimmen aıqaspaǵan soń tıtýlynan aıyryldy. Siz jekpe-jekke shyqqyńyz keletin adam sol ma?
- Iá, ol men bokstasqym keletin basty qarsylasym. Biz onymen qyrkúıekte aıqasqymyz keldi. Meksıkanyń Táýelsizdik kúni– 14 qyrkúıekte. Aqsha kóp túsýshi edi. Bilmeımin, ol nege tıimsiz dep oılaǵanyn.
- Múmkin, qorqatyn shyǵar?
- Jol, ol qoryqpaıdy. Eshkim de qoryqpaıdy. Múmkin, ol uzaǵyraq chempıon bolyp qalǵysy keletin shyǵar, synǵa túskisi kelmeıtin bolar.
- Biraq, ol bas tartqandyqtan orta salmaqtaǵy IBF álem chempıony tıtýly bos tur. Siz sol úshin Derevıanchenkomen aıqasasyz. Sizderdiń jekpe-jekterińiz qashan?
- 5 qazan.
- Ekeýińizdiń bireýińiz bos turǵan álem chempıony tıtýlyn ıemdenedi ǵoı?
- Iá.
- Keıin «Kanelo» belbeýdi ózine qaıtarǵysy kelse aıqas ótedi me?
- Múmkin. Ony aıtý qıyn. Bul bıznes. Bir kúni daıynmyn dep oılaısyń, kelesi kúni daıyn emespin deısiń. Bul ómir.
- Siz ony nokaýtqa túsiresiz be?
- Joq, - bul qıyn aıqas, joǵary deńgeıdegi jekpe-jek. «Iá, ony jeńemin» dep aıtý ońaı, biraq men ózimniń, ol óziniń jaǵdaıyn jaqsy biledi. Aıqas qıyn bolady. Boks – sporttyń qıyn túri, bir soqqy ómirińdi ózgertýi múmkin. Tek qana aıqasty emes, sportshynyń búkil ómirin ózgertýi múmkin.
- Siz óte qarapaıymsyz. Kóptegen boksshylar, Muhammed Álıdiń ózi de qarsylasy týraly jaman sózder aıtqandy jaqsy kóretin. Qarsylasynyń mıyna kirip, onyń tepe-teńdigin buzýdy qalaıtyn. Siz ondaı emessiz.
- Men ondaı emespin. Meniń barym osy, bireý sııaqty bolǵym kelmeıdi. Tresh-tokty unatpaımyn. Men úshin boks – sport, men bokstyń jankúıerimin, men naǵyz chempıondardy qurmetteımin.
- Siz DAZN-men kelisim jasadyńyz. Olar sizge jaqsy aqsha tóleıdi. Siz aqshany basqara alasyz ba? Sportshylardyń óz aqshasyn kólikterge, qymbat buıymdarǵa, saýyq keshterge jumsaǵan oqıǵalary kóp bolǵan.
- Meniń otbasyma, balalaryma, ózime az qarajat jumsaımyn.
- Demek, eshqandaı «Rolls-Roıs» kerek emes pe?
- Mende «Rolls-Roıs» boldy. Bul qaljyń.
- Siz qazir Los-Andjeleste basseıni bar záýlim úıde turyp jatsyz ba?
- Joq, biraq munda ómir súrý óte qymbatqa túsedi.
- Jubaıyńyz sizdiń aıqastaryńyzǵa barady ma?
- Joq, eshqashan. Bul onyń emes, meniń isim.
- Ulyńyzdyń boksqa barǵanyn qalaısyz ba?
- Joq. Ol aqyldy, tórt til biledi – óskeleń urpaq. Men – «burynǵy mekteptiń» adamymyn, bizdiń ómirimiz ártúrli. Onyń jaǵdaıy basqa.
- Qaı jasqa deıin bokstaspaqshysyz?
- Bilmeımin. Qazir 10 jyl burynǵydaı kúsh-qýatym da, jyldamdyǵym da bar. Oǵan qosa tájirıbem, tanymaldyǵym, demeýshim, jańa ıdeıam bar. Onyń qandaı ıdeıa ekenin aıtpaımyn – bul boks, qaýipti sport, jaǵdaı kez kelgen kezde ózgerýi múmkin.
- Siz eshqashan nokaýtqa túsip kórmedińiz. Qalaısha?
- Genetıka, meni qoldaıtyn ata-anam, jankúıerlerim. Salaýatty ómir salty.
- Siz 37 jasyńyzda ózińizdiń formańyzdy saqtap qalǵansyz. Jıi jattyǵasyz ba?
- Kún saıyn eki ret jattyǵamyn. Birinshisi – 3 saǵat, ekinshi ret – 4. Kúnine 7 saǵat. Tipti, táýligine 24 saǵat jattyǵamyn, sebebi uıqyńdy, dıetańdy qadaǵalap otyrýyń kerek. Fokýsty joǵaltsań, bári bitti.
- Qazaqstanǵa jıi barasyz ba? Ol jaqta ómir qalaı?
- Keıde baryp turamyn, ol jaqta dostarym bar. Maǵan saıahattaǵan unaıdy. Reseıde – Máskeý, Sankt-Peterbýrg, men tildi bilgendikten maǵan ol jaqta júrgen jeńil. Aqyldy adamdarmen kezdeskendi unatamyn. Qytaı, Malaızııa, Japonııa – keremet oryndar. Ol basqasha álem.
- Sizge qaı jerde aıqasqan unaıdy?
- «Medıson Skver Gardende». Ol jer bokstyń Mekkesi. Onda úzdik aıqastar ótti – Álı, Taıson judyryqtasqan. Onyń atmosferasy basqasha, barlyq kórermender – boks sarapshylary, olar úshin aıqasqan unaıdy.
