Men osy elde týǵandyqtan, osy eldiń adamymyn - rejısser T.Bekmambetov
ANA. 1 shilde. QazAqparat /Gúlmıra Álıakparova/ - Búgin Astanada Ekshn-fılmderdiń ІІ halyqaralyq fılmderiniń ashylýyna oraı ótken baspasóz máslıhatynda Tımýr Bekmambetov, ózin halyqaralyq rejısser retinde sanamaıtyndyǵyn aıtty.
T.Bekmambetov jýrnalısterdiń «Sizdi qaı eldiń rejısserleriniń qataryna jatqyzý kerek, qazaqstandyq pa, álde reseılik pe?», - degen saýalyna kelesideı jaýap qaıyrdy: «Men kezinde birtutas bolǵan memlekette týyp, sonda óstim. Men ony qalasam da qalamasam da, ol solaı jáne solaı bolyp qala beretin shyǵar. Astarahan men Atyraý arasynda shekara joq dep esepteımin. Sebebi, bul shekara men úshin aýyr tıedi. Degenmen, ishteı ony sezinbeýge tyrysamyn. Bul suraq men úshin aýyr sondyqtan, oǵan ishteı jaýap berýden qashýǵa tyrysamyn. Solaı ómir súrýge ońaı. Qazir Qazaqstan men Reseı arasyndaǵy ózara qarym-qatynastar jaqsy stsenarıı boıynsha órbýde. Sondyqtan ol týraly áli oılanbaýyma bolady», - dedi.
T.Bekmambetov: «Ózimdi halyqaralyq rejıssermyn dep sanamaımyn. Men osy elde týǵandyqtan, osy eldiń adamymyn», - dep qosa otyryp, ózin «keńestik rejısser» dep ataý usynysymen kelisti.
Sondaı-aq, biregeı stsenarııli ekshn-fılmderdi túsirýmen aınalysatyn álemge belgili rejısser, ózin basqalardan artyq ta, erekshemin dep sanamaıtyndyǵyn aıtty. «Men ózime unaıtyn, qolymnan keletin dúnıeni jasaımyn. Ózime jumys isteýge qyzyqty adamdardy tańdap alýǵa tyrysamyn jáne jasap jatqan iske basymmen kirip ketemin. Naqty kınonyń protsesine, onyń tiline toqtalatyn bolsam, Qazaqstanda týǵan adam retinde kınony adamdarmen qatynasý, jańa adamdarmen kezdesý múmkindigi úshin baǵalaımyn», - dep túıindedi.
