Men Nurbekke de, bapkerine de fınalda ne isteý kerektigin aıttym — Serik Sápıev

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda London Olımpıadasynyń chempıony Serik Sápıev parıjge qazaq boksshylaryn arnaıy qoldaýǵa kelgenin aıtty.

«Men Parıjge qazaq boksshylaryna qolaý kórsetýge keldim. Ókinishke qaraı, búgin Nazym Qyzaıbaı jartylaı fınalda qytaılyq qarsylasyna jol berip, qola júldeni qanaǵat tutty. Árıne, ókinishti. Ol negizi altyn alatyn qyz edi. Qolynan kelgeniniń barlyǵyn jasady. Meniń oıymsha ol taktıkalyq jaǵynan jeńilip qaldy dep oılaımyn. Qarsylasy da ońaı shaǵyla qalatyn jańǵaq emes edi ǵoı. Utyp ketti», — dedi Serik Sápıev.

Sonymen qatar Olımpıada chempıony bar úmit Nurbek Oralbaıda qalǵanyn basa atap ótti.

«Endigi úmit — Nurbek Oralbaıda. Búkil halyq Nurbekke senim artyp otyr. Ol ýkraınalyq boksshysymen chempıondyq ataqty sarapqa salady. Nurbektiń qarsylasy fızıkalyq turǵydan óte myqty boksshy. Ol Olımpıadanyń kúmis júldegeri bolǵan. Sondyqtan, Nurbekke eshqandaı bosańsýǵa, qatelik jasaýǵa bolmaıdy. Ol ekeýi osyǵan deıin bir ret kezdesken. Nurbek bul joly qalaı judyryqtasý kerektigin jaqsy bilýi kerek dep oılaımyn. Óz basym, Nurbekke de, jeke bapkerine de fınalda ne isteý kerektigi jóninde aqyl-keńesimdi aıttym. Ýkraınalyq boksshy kóp jaǵdaıda aldyǵa umtyla beredi, al Nurbek bundaı kezde kútip alyp, turyp berse bolǵany. Altyn bizdiki dep oılaımyn», — dedi Sápıev.

Esterińizge sala keteıik, búgin Nazym Qyzaıbaı el qorjynyna Olımpıadanyń úshinshi qola júldesin syılady.