Men Qazaqstanǵa qaıta kelýdi josparlap otyrmyn - Gollıvýd ártisi Mıshel Rodrıges
ASTANA. 2 shilde. QazAqparat /Gúlmıra Álıakparova/ - Aldaǵy ýaqytta Qazaqstannyń ótkeni men búgini týraly kóbirek bilýge úmittimin. Bul oıyn Astanada ótip jatqan Ekshn-fılmderdiń «Astana» halyqaralyq festıvaline arnaıy kelgen Gollıvýd ártisi Mıshel Rodrıges bildirdi.
«Festıvaldiń ashylý saltanatyna qatyspaǵanym úshin keshirim suraımyn. Shuǵyl sharýalarym shyǵyp qaldy. Biraq búgin men osyndamyn», - dedi ol búgin ótken baspasóz máslıhatynda.
Gollıvýdtyń kóptegen tanymal ekshn-fılmderiniń basty keıipkeri M.Rodrıges Astanada eki kún bolýdy josparlap otyr. «Bul jerdiń ádemiligin kórgennen keıin, munda qaıta kelýdi josparlap otyrmyn. Jáne aldaǵy ýaqytta Qazaqstannyń ótkeni men búgini týraly kóbirek bilýge úmittimin. Sebebi, men munda kóp jańa dúnıelerdi kórdim», - dedi ol.
Ártis ekshn janrly fılmderdi unatatynyn jáne olarǵa 10 jyl boıy túsip kele jatqanyn aıtty. Biraq sońǵy ýaqytta erlerge tán rólderdi oınaýdan qajı bastaǵan. Onyń pikirinshe, Gollıvýd stsenarııshileri ekshn-fılmderdegi erler men áıelderdiń rólderin ajyrata almaıdy jáne ol naqty áıeldiń róli ekendigine jete mán bere bermeıdi. Sol sebepti ol, ózi túsetin fılmderdiń stsenarııine jıi jaǵdaıda ózgerister engizedi. Bul - M.Rodrıgestiń qatysýymen túsirilgen 10 fılmniń ishinde 9-ynda kezdesedi. «Sondyqtan, menimen kelesi fılmdi túsirýge josparlaǵandar, stsenarııdegi sózder men replıkalarǵa mindetti túrde ózgerister engiziletinin aldyn ala bilip otyrady», - deıdi ol.
Ártistiń aıtýynsha ol, ekshn janrly fılmderdi jasaýshy álemdik rejısser Tımýr Bekmambetovtyń kartınasyna túsýge qýana keliser edi. «T.Bekmambetovtyń Anjelına Djolımen túsirgen «Asa qaýipti» («Wanted») fılmin ózime úlgi etemin. Sondyqtan onyń fılmine qýana-qýana túsýshi edim», - dep túıindedi ol.
