«Men qazaqsha sóıleımin»: Ult ókilderi arasyndaǵy respýblıkalyq baıqaý aıaqtaldy
Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy uıymdastyrǵan baıqaýdyń sharty boıynsha úmitker qazaqtyń «Batyrlar jyrynan» bireýin jatqa mánerlep oqyp berýge tıis boldy.
«Memleket basshysy «Ana tili» gazetine bergen óziniń arnaıy suqbatynda qazaq tilin jaqsy biletin ózge ult ókilderin qoldaý týraly tapsyrma bergen bolatyn. Bul aktsııanyń maqsaty – jastardy eline degen súıispenshilik, adaldyq, eńbekqorlyq, ar-namys tárizdi adamgershilik qundylyqtar negizinde tárbıeleý jáne qazaq tilin ultaralyq qatynas tiline aınaldyrýdy keńinen nasıhattaý. Qataryńyzdyń kóptigi, árbirińizdiń jan-jaqty daıyndyǵyńyz kóńil qýantpaı qoımaıdy», - dedi qorytyndy bas qosýda quttyqtaý sóz sóılegen Til komıtetiniń tóraǵasy Ádilbek Qaba.
«Til-Qazyna» ortalyǵynyń bas dırektory, jazýshy Álibek Asqardyń pikirinshe, elimizdiń on tórt óńiri men úsh qalasynan eńbektegen sábıden eńkeıgen kárige deıin 20 etnos ókilinen quralǵan 243 úmitker qatysqan. «Qobylandy batyr» jyry baıqaý barysynda 76 ret tolǵansa, odan keıin «Alpamys batyr» eposy tur.
Qatysýshylardyń jas ereksheligine kóz júgirtsek, eń jasy –Nur-Sultan qalasy «Báıterek» balabaqshasynyń tárbıelenýshisi 5 jasar Marııa bolsa, úlkeni – Shymkent qalasynyń turǵyny, zeınetker Fatkýlbaıanova Nasıma Borısqyzy eken.
«Bala kúnimizden «Batylar jyryn» basymyzǵa jastanyp ósken halyqtyń urpaǵymyz ǵoı. San ǵasyrlar qoınaýynan kele jatqan jyr jaýharlarynan ózge ult ókilderiniń eki aıdan astam ýaqyt boıy sóz marjanyn tókkenin kórgenińde, qazaq tiliniń bolashaǵy týraly eriksiz úlken úmitpen oılanyp qalasyń», – dedi ol.
Uıymdastyrýshylardyń aıtýynsha, «Batyrlar jyrynan» basqa, patrıottyq rýhtaǵy poezııalyq shyǵarmalar men tarıhı taqyrypqa arnalǵan ballada-dastan oqyǵandar boldy.
«Batyrlar jyrynan» úzindini mánerlep jatqa oqyp, áleýmettik jelide eń kóp lúpil jınaǵan tómendegi azamattar júldeger bolyp anyqtaldy. Olardyń árqaısysyna 30 myń teńge kóleminde syılyqaqy berildi:
Pavlodar oblysy Ekibastuz qalasy №25 qazaq qyzdar gımnazııasynyń 11-synyp oqýshysy Legkaıa Inessa Vıktorovna,
Aqtóbe oblysy Alǵa aýdany Balalar men jasóspirimder sport mektebiniń jattyqtyrýshy-oqytýshysy Karasaeva Ilona Aleksandrovna,
Túrkistan oblysy Sozaq aýdanynyń turǵyny Ashırmet Sıtara Sultanmuratqyzy,
Taraz qalasy «Habar-24» telearnasynyń tilshisi Tregýbova Vıktorııa Vıacheslavovna,
Túrkistan oblysy Saryaǵash aýdany, Arystanbap joǵary kolledjiniń 2-kýrs stýdenti Ravan-Nahchıvanı Indıra.
Budan basqa mánerlep oqyp, sheberlik kórsetken taǵy 10 úzdik qatysýshy QR Mádenıet jáne sport mınıstrligi Til saıasaty komıteti tóraǵasynyń dıplomymen marapattaldy. Olar: Qaraǵandy oblysy, Prıozersk qalasy №2 orta mekteptiń 7-synyp oqýshysy Kýznetsov Vladımır, Almaty oblysy Talǵar aýdany №4 jalpy bilim beretin mekteptiń bastaýysh synyp muǵalimi Poplavskaıa Elena Igorevna, Pavlodar oblysy Shaqat orta mektebiniń 11-synyp oqýshysy Evloeva Galına, Qaraǵandy oblysy, Prıozersk qalasy №2 orta mekteptiń 8-synyp oqýshysy Mýrashkına Dıana Aleksandrovna, Almaty qalasy №110 mektep-gımnazııanyń 6 «D» synyp oqýshysy Kýzovnıkov Rýslan, Aqtaý qalasynan muǵalim Sılchenko Irına Sergeevna, Aqtóbe oblysy, Qobda aýdany Taldysaı aýyldyq klýby qyzmetkeri Maltsev Aleksandr Vladımırovıch, Almaty oblysy Qapal aýyly ákimi appartynyń bas mamany Chepel Vladımır Sergeevıch, Shymkent qalasy M.Mametova atyndaǵy №111 jalpy orta bilim beretin mekteptiń 9-synyp oqýshysy Abdýgafýrova Azıza, Nur-Sultan qalasy «№1 Báıterek» balabaqshasynyń tárbıelenýshisi Marııa.
Shara moderatory ortalyq dırektorynyń orynbasary Aıdos Tursynbaıuly málimdegendeı, bul baıqaýdan eshkim qur alaqan qalǵan joq. Óıtkeni aramyzda qazaq tilinde sóılemeıtin nemese sóılesem, jańsaq aıtyp kúlki bolamyn-aý dep áli de bolsa tartynyp, orynsyz qysylyp júrgenderge bulardyń árqaısysynyń batyl áreketi úlgi bolarlyq. «Batyrlar jyrynan» jatqa úzindi oqyp, qazaq tilin nasıhattaý boıynsha qosqan úlesi úshin barlyq talapkerge «Til-Qazyna» ulttyq ǵylymı-praktıkalyq ortalyǵy bas dırektorynyń Alǵys haty tabystaldy.
