«Men qazaqpyn»: Patrıottyq chellendj Eýropa tórine jetti
NUR-SULTAN. QazAqparat - Qazaqstannyń Belgııadaǵy Elshiligi elimizdiń Táýelsizdigine arnalǵan «Men qazaqpyn» chellendjine qoldaý kórsetti, dep habarlaıdy QazAqparat tilshisi.
«Qazaqstannyń Brıýsseldegi Elshigi elimizdiń Táýelsizdik kúninen arnalǵan chellendjge qoldaý kórsetedi. Búgingi kúni barynsha tanymaldyqqa ıe bolyp otyrǵan patrıottyq qazaq ánin Elshilik qyzmetkeriniń uly Temirlannyń oryndaýynda qarsy alyńyzdar», - dep jazdy Elshilik Facebook-tegi resmı paraqshasynda.
Elshiliktiń áleýmettik jelisinde jarııa etilgen vıdeodan qazaqtyń ulttyq kıimin kıgen Temirlannyń «Men qazaqpyn» ánin jan-tánimen berilip aıtqanyn baıqaýǵa bolady.
Esterińizge sala ketsek, Pavlodar qalasynyń orta mektepteri arasynda elimizdiń Táýelsizdik merekesine oraı erekshe chellendj bastaǵany týraly buǵan deıin habarlaǵan bolatynbyz.
Áleýmettik jelide jarııalanǵanyna táýlik bolmaı bul vıdeony 10 myńnan astam adam tamashalap, onyń 400-den astamy lúpil bassa, bólisken adamdardyń qatary 600-ge jýyqtaǵan edi.
Aıta ketsek, Qýandyq Raqymnyń «Men qazaqpyn» ánin 2018 jyldyń 7 mamyrynda Qarýly kúshterdiń 3 myń sarbazy jaýyngerlik parad kezinde shyrqaǵan edi. Bul týyndynyń sózin aqyn Nurjan Ómirbaı, al ánin Jarashan Tólebaı esimdi jas kompozıtor jazǵan. Án avtory Jarasqan Tólebaıdyń aıtýynsha, «Men qazaqpyn» áni keıingi býyn ókilderiniń shetel mýzykasyna elikteýi órship bara jatqan ýaqytta, eldiń rýhyn oıatatyn qazaq áni jat eldiń dańǵazasyna toıtarys bolsyn degen maqsatta týyndaǵan.
QR Prezıdenti Qasym-Jomart Toqaev «Men qazaqpyn» patrıottyq ánin oryndaıtyn chellendjdi qoldady. «Óte jaqsy bastama! Qoldaımyn! Bul án halyqtyń rýhyn kóterip, patrıotızmdi arttyrý úshin keń aýqymda dáriptelse oryndy bolar edi. Osyndaı dúnıeler eldi birlikke shaqyrady», - dep jazady Memleket basshysy twitter paraqshasynda.
