«Men qazaqpyn» megajobasyna kúzetshi men jumyssyz aqtóbelikter de qatysyp jatyr
AQTÓBE. QazAqparat - Aqtóbede «Men qazaqpyn» megajobasynyń irikteý kezeńi bastaldy. Terme, kúı, dástúrli án nomınatsııasy boıynsha baıqaýǵa qatysýshylar arasynda kúzetshi, jumyssyzdar da bar. Basym bólimi mýzyka pániniń muǵalimi, mádenıet salasynyń qyzmetkerleri, dep habarlaıdy QazAqparat tilshisi.
Aqtóbeniń 12 aýdanynda týma talatty izdeý, irikteý bastaldy. Alǵa aýdanynyń ónerpazdary «Ádemi-aý», «Dúnıe-aı», «Elge sálem», «Ósıet», «Qyzym saǵan aıtamyn» halyq ánderin shyrqap, Ábýbákir men Sáttiǵuldyń termesin oryndady. Ónerpazdar aldyn-ala daıyndalǵan, baıqaýdyń erejesimen tolyq tanysqan. Al aýdandaǵy irikteýge ilikpegenderi Aqtóbe qalasynda ótetin synǵa qatysady. Sebebi, úzdikter arasynda eń myqtyny anyqtaýda esh kedergi bolmaıdy, bárine bir múmkindik beriledi.
«Aýdandyq irikteýdiń alǵashqy jeńimpazdary anyqtala bastady. Qatysýshylardyń mamandyqtary ártúrli. Biz mindetti túrde mýzykalyq bilimi bar adamdar qajet dep aıta almaımyz. El arasynda týma talanttar bar jáne biz olardyń anyqtap, dáriptep, Qazaqstanǵa tanyta bilýimiz kerek. Ótken jyly kúı nomınatsııasynda Aqtóbe úzdik shyqty. Bıyl da jeńisten úmittimiz. Sebebi, Aqtóbede myqty tershiler de bar», - dedi «Aqtóbe» telearnasynyń dırektory Ernur Býrahan.
Eske salsaq, «Men qazaqpyn» megajobasynyń kúıshi nomınatsııasy boıynsha ótken jyly aqtóbelik Ardaq Eleýsiz jeńimpaz atanǵan bolatyn. Bıyl da 18-40 jas aralyǵyndaǵy ónerpazdar baq synap, mamyr-maýsymda irikteýge qatysady.
«El ishindegi daryndy, talantty ónerpazdy tanýǵa jaqsy múmkindik týdy. Bir ǵana Alǵa aýdanynda 5 adam shyqty. Aldaǵy bir aıda irikteý aıaqtalyp, 17 maýsym kúni oblystyń úzdikteri anyqtalady. Qazirgi kezde mádenıet, bilim bólimderi, mýzyka, saz mektepteri irikteý kezeńine belsendi qatysyp jatyr. Qatysýshylardyń naqty sany belgisiz. Іrikteý ótip jatqan ýaqytta «qatysamyn» dep jazylyp, óner kórsetse de bolady», - dedi Aqtóbe oblystyq mádenıet basqarmasynyń basshysy Marjan Qorǵanbaeva. 
