«Men - qazaqpyn!» megajobasyna qatysatyn batysqazaqstandyqtar irikteldi
ORAL. QazAqparat - Batys Qazaqstan oblystyq qazaq drama teatrynda «Men - qazaqpyn!» atty megajobanyń jeńimpazdary anyqtaldy, dep habarlaıdy «QazAqparat» tilshisi.
Memleket basshysy «Bolashaqqa baǵdar: rýhanı jańǵyrý» atty baǵdarlamalyq maqalasynda ulttyq kodty saqtaý úshin ulttyq sana-sezimniń kókjıegin keńeıtý qajettigin atap kórsetkeni belgili. «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda, ulttyq rýhymyz boıymyzda máńgi qalýǵa tıis», degen bolatyn Elbasy. Mine, osyǵan oraı QR Aqparat jáne kommýnıkatsııalar mınıstrligi men «Qazaqstan» ulttyq telearnasy birlesip qolǵa alǵan atalmysh halyqaralyq megajobanyń maqsaty - ár óńirden tańdaýly dástúrli ánshi, kúıshi, jyrshy-termeshilerdi anyqtap, ulttyq óner ókilderin keńinen nasıhattaý. Іrikteý kezeńderi Qazaqstan oblystarynda ǵana emes, sonymen qatar Reseı, Qytaı, Mońǵolııa men Altaıda da ótetin bolady.
Baıqaýdyń Batys Qazaqstandaǵy oblystyq kezeńine barlyǵy 30 úmitker qatysyp, baq synady. Saıys qorytyndysynda kúıden Aqylbek Bektasov, terme-jyrdan Jánibek Ǵaınetdınov, dástúrli ánnen Danııar Eleýov úzdik atandy. Endi olar Astanada ótetin fınalda Aq Jaıyqtyń namysyn qorǵaıtyn bolady. Qazylar alqasynyń tóraǵasy, dástúrli ánshi Ómirqul Aınııazovtyń sózine qaraǵanda, endi osy jeńimpazdardy tálimger retinde respýblıkalyq saıysqa ózi ázirlemekshi. Olardyń repertýarynan bastap sahna mádenıetine deıingi barlyq sheberligi ushtalady.
«Oraldaǵy baıqaý keremet ótti. Jastyq shaǵymyz kóz aldymyzǵa kelip, qazaq ekenimizdi sezine túskendeı boldyq. Kózderi jaýdyraǵan qyz-bozbala...úkisi yrǵalǵan kəmshət bórik, oıýly qamzol, búrmeli kóılek... Kezek tógilgen ən men kúı, terme... Tolqyǵan, qýanǵan, maqtanysh kernegen, qulaqqa qıqý tıgende, "qaǵynyp túsken" arqaly sətter... Dalanyń dabysy tolyp tur myna jerde, dombyranyń kúmbirimen, qobyzdyń sarynymen, sorǵalaı tógilgen əýezdi ənmen kósh-kerýen kelip qona qalypty qazaqtyń tórine. Netken səndi, netken qasıetti kósh edi. Tyńdaǵan saıyn tóbe quıqań shymyrlap, kózińe jas kelip, arqań keńip, "úıge (əkeńniń úıine!) kelgendeı" bolasyń. Ónerli jastardyń japyrlap ósip qalǵanyna qýanyp, təýbə qylasyń. Maqtanysh pa, senim be, əıteýir keremet bir sezim bıleıdi boıdy. Seniń jastyǵyń da syǵalap turǵan sııaqty ənebir buryshtan. "Myna bir bala Əbekeńe (Amangeldi Ǵubaıdýllın) uqsata sala ma "Qanapııany", nemene?..", "Məssaǵan, mynaý qarań Kósherǵalıdyń ózi ǵoı!", " Əı, ənebir dombyra qaǵys toshno Qatımollaniki!" "Baıannyń qoltańbasy..." "Səýleniń tastamy...", "Saǵadattyń "ap!" deıtini!", dep ótken kún men búgindi jamyrata túskendeısiń. Kózin jerden almaıtyn uıalshaq qobyzshy qyzdyń ıbaly otyrysy tipten tanys. Óner de ómir sııaqty osylaısha tolassyz jalǵasady eken ǵoı. Múmkin keı jeri artyq, keı jeri kem bolar, biraq ulttyq ónerdiń jalǵasyp jatqany shyndyq. Óner kerýeni kelip qonaqtap tur ǵasyrlar qoınaýynan. Erke ən, erkinsal kúı tógilip jatyr tolyqsyp. Ulttyq kod degen ne desem, osy eken. Ony tek Qazaq qana túsinedi. Ulttyq óner kerýeni máńgilik úzilmegeı», - dedi «QazAqparat» tilshisine belgili aıtysker aqyn, ustaz Darıǵa Mushtanova.
