«Men qazaqpyn» megajobasyna aqshany aıamaýymyz qajet - mınıstr Abaev

ASTANA. QazAqparat - Búgin Astanada ótken baspasóz máslıxatynda jýrnalıster "Men qazaqpyn" atty xalyqaralyq baıqaýǵa jumsalatyn qarjyǵa qatysty suraq qoıdy, dep xabarlaıdy QazAqparat tilshisi.

"Qazaqstan" RTRK" basqarma tóraǵasy Erlan Qarınniń aıtýynsha, ázirshe osynaý aýqymdy jobanyń naqty somasy belgisiz. Alaıda korporatsııa basshylyǵy ony aýtsorsıng qyzmetine júginbeı, shyǵarmashylyq ujymnyń óz kúshimen iske asyrýdy josparlap otyr. "Osynyń arqasynda biraz aqshany únemdeýge bolady dep oılaımyz. Ázirshe, korporatsııa barlyq shyǵyndardy ózi óteıdi. Aldaǵy ýaqytta demeýshilerdi de tartatyn shyǵarmyz", - dedi Karın.

Osy oraıda QR Aqparat jáne kommýnıkatsııalar mınıstri Dáýren Abaev ta óz oıyn jetkizdi. "Men ózim bundaı suraqtyń qoıylatynyn bilgenmin. Osy oraıda aqparattyq agenttikterge taqyryptyń ataýyn da usyna alamyn. "Mınıstr Abaev atalǵan jobanyń qymbat bolǵanyn qalaıdy" dep berseńder de bolady. Shynymen de, óz basym "Men qazaqpyn" baıqaýynyń qymbat bolǵanyn qalaımyn. Kerek bolsa, demeýshilerdi tartyńyz. Bolmasa, "Qazaqstan" korporatsııasy da ony óz kúshimen iske asyra alady dep oılaımyn. Osy jobaǵa atsalysqan barlyq qyzmetkerlerge jaqsy qalamaqy tólenýi tıis. Dál osy jobaǵa aqshany aıamaıyqshy, sapaly dúnıe bolyp shyqsyn. Jaqsy ári sapaly jobany jasaǵanymyz jón", - dep atap kórsetti Abaev.

Aıta keteıik , búgin Astanada ótken baspasóz máslıxatynda QR Aqparat jáne kommýnıkatsııalar mınıstri Dáýren Abaev "Men qazaqpyn" atty xalyqaralyq megajobanyń bastalatynyn jarııalady. "Qazaqstan" RTRK" basqarma tóraǵasy Erlan Qarınniń aıtýynsha, baıqaýdyń túpki maqsaty - shalǵaı aýyldarda júrgen ónerpazdardy úlken saxnaǵa shyǵarý .