«Men qazaqpyn» baıqaýynyń irikteý týrlary Reseı, Qytaı men Mońǵolııa elderinde ótedi
"Biz Altaı respýblıkasynyń Qosaǵash aýdanynda irikteý týrlaryn ótkizýdi kózdeımiz. Ol jerde qazaq dıasporasynyń biraz ókilderi turady. Budan bólek, Baıan-Ólgeı men Shyńjań- Uıǵyr avtonomııalyq ólkesinde irikteýler uıymdastyrylady. Dál osy aımaqtarda qazaqtyń dástúrli mýzykasy jaqsy saqtalǵan. Sosyn kúı, terme sııaqty janrlardyń birneshe mektebi áli de bar. Qazaqstannyń keıbir jerlerinde ondaı janrlar saqtalmasa da, qandastarymyzdyń arqasynda ony qaıta qalpyna keltirýge múmkindik bar. Osynyń ózi mýzykany zerttep júrgen ǵalymdar úshin úlken azyq bolady", - deıdi Qarın.
QR Aqparat jáne kommýnıkatsııalar mınıstri Dáýren Abaev ta "Men qazaqpyn" xalyqaralyq baıqaýy arqyly daryndy ónerpazdardyń ǵana emes, qolǵa túspeı júrgen shyǵarmalardyń da tabylatynyna senimdi. Baıqaýdyń alǵashqy irikteý týrlary 5 maýsym kúni Almaty oblysynda bastalady. Al shet elderdegi konkýrstar shilde aıynda uıymdastyrylady. Osydan keıin kórermen qaýym baıqaýdyń kúndeligi men negizgi konkýrsyn teledıdardan kóre alady. Jeńimpazdar "Jyldyń eń úzdik dástúrli ánshisi", "Jyldyń eń úzdik termeshisi" jáne "Jyldyń eń úzdik kúıshisi" atalymdary boıynsha marapattalady.
Aıta keteıik , búgin Astanada ótken baspasóz máslıxatynda QR Aqparat jáne kommýnıkatsııalar mınıstri Dáýren Abaev "Men qazaqpyn" atty xalyqaralyq megajobanyń bastalatynyn jarııalady.
"Qazaqstan" RTRK" basqarma tóraǵasy Erlan Qarınniń aıtýynsha, baıqaýdyń túpki maqsaty - shalǵaı aýyldarda júrgen ónerpazdardy úlken saxnaǵa shyǵarý . Mınıstr atalǵan bastamaǵa aqshany aıamaý qajet dep sanaıdy .
