Men qarsymyn - Arhımed Muhambetov Qostanaı oblysyn Torǵaıǵa ózgertý týraly
ASTANA. QazAqparat - Qostanaı oblysynyń ákimi Arhımed Muhambetov Qostanaı oblysynyń ataýyn Torǵaı oblysy dep ataý týraly bastamaǵa qatysty pikirin bildirdi, dep habarlaıdy QazAqparat tilshisi.
Búgin Astanada ótken brıfıngte bastamashyl toptyń oblys ataýyn ózgertý týraly ashyq hatyna qatysty suraq qoıyldy.
«Hatpen tanyspyn. Kórdim. Jalpy, meniń ustanymym - qarsymyn. Óıtkeni, Qostanaı oblysynyń tarıhtan kele jatqan óziniń ataýy bar. Qatelespesem, bul hatqa 17 adam qol qoıǵan. Birneshe adamdy tanımyn. Ózim olarmen jeke sóıleskende kóp aýdanda ákim bolǵan Sabyrjan Ahmetuly degen kisi «men bul hatqa qol qoıǵan joqpyn» dep bas tartyp otyr. Qalıbek Deripsaldın (kompozıtor) de ol hatqa qol qoımaǵanyn aıtýda. Bul jerde, sondyqtan halyqty dúrliktirý durys emes dep oılaımyn», - dedi Arhımed Muhambetov.
Oblys ákimi eldi meken ataýyn ózgertýdiń tártibi baryn, tyńdaýlar ótý kerektigin eskertti.
«Sondyqtan, kóre jatarmyz. Biraq, jalpy óz ustanymymdy aıtaıyn. Bizde Torǵaı ataýymen qalyptasqan, burynnan kele jatqan aýdan ortalyǵy bar. Eger otyzynshy, qyrqynshy jyldary Qostanaı qalasynyń aty Torǵaı dep atalsa, onda burynǵy atyn qaıtarý boıynsha jumys bolsa bir jón. Al bul jerde ózimniń ustanymym - qarsymyn», - dep túıdi Arhımed Muhambetov.
