Men Kanelomen aıqasqa daıynmyn - Golovkın
ASTANA. QazAqparat - Búgingi jekpe-jekten keıin suxbat bergen qazaqstandyq boksshy Gennadıı Golovkın meksıkalyq boksshy Saýl "Kanelo" Alvarespen judyryqtasýǵa daıyn ekenin taǵy bir márte málimdedi, dep xabarlaıdy QazAqparat tilshisi.
"Árıne, men ol jekpe-jekti qalaımyn. Men daıynmyn. Sol jekpe-jekke degen yntam kúshti bolyp tur. Ony ótkizýge múddelimin", - dedi Golovkın. Sondaı-aq qazaqstandyq boksshy Denıel Djeıkobspen qaıta kezdesýge ázir ekenin de jetkizdi.
Aıta keteıik, búgingi jekpe-jekte orta salmaqta WBA (Super), IBO, WBC jáne IBF nusqalary boıynsha álem chempıony Gennadıı Golovkın (36-0, 33 KO) kezekti jeńisine qol jetkizip, barlyq belbeýlerin qorǵap qaldy. Alaıda úzdiksiz nokaýttar serııasy osymen aıaqtaldy. Al Denıel Djeıkobs (32-1, 29 KO) óziniń sporttyq mansabynda ekinshi ret jeńilis tapty. Jekpe-jekten keıin Gennadıı Golovkın osy jolǵy aıqasty 12-shi raýndqa deıin jetkizýdi kózdemegenin málim etti .
