Men istemegen isim úshin aıypty bolǵym kelmeıdi - Qýandyq Bıshimbaev
ASTANA. QazAqparat - Burynǵy Ulttyq ekonomıka mınıstri Qýandyq Bıshimbaev ózine taǵylǵan aıyppen kelispeıtinin jetkizdi, dep habarlaıdy «QazAqparat» HAA tilshisi.
«Adamdar óz aıybyn moıyndaǵan kezde - bul, bálkim, keremet shyǵar. Biraq, aıypty moıyndaý meni qosa iliktirý úshin jaýapkershilikti artyp, qaıdaǵy bir áńgimeni oılap tabýmen birge júrgizilmese kerek edi (...) Osynda aıtylǵan sózderdiń bári de jaı ǵana sóz bolyp qaldy. Qurmetti sot, sot barysynda zerttelgen tergeý materıaldary naqty dáleldermen - ne telefondaǵy áńgimemen, ne egjeı-tegjeıli áńgimemen (...) rastalmaı otyr. Meniń bar aıybym - jasamaǵan isimdi moıyndamaýym ǵana», - deıdi sottalýshy.
Onyń aıtýynsha, qylmys ústinde ustalǵandar jazany jeńildetý úshin aıyptaryn moıyndaýda.
«Keshe biz osy adamdardyń jeke moıyndaýy men olarǵa qatysty dálelder baryna kóz jetkizdik. Memlekettik aıyptaýshy olarǵa belgili bir merzimdi surap otyr. Bul jaǵdaı meniń aıtqanymnyń bárin de rastaıdy. Prokýrorlar suraǵan jazalardyń bári de meniń aıtqanymdy rastaı túsedi», - dep túıdi Bıshimbaev.
Aıta ketsek, budan buryn Memlekettik aıyptaýshy burynǵy Ulttyq ekonomıka mınıstri Qýandyq Bıshimbaevty 12 jylǵa bas bostandyǵynan aıyrýdy suraǵan bolatyn. Atalǵan is boıynsha aıyptalýshy retindegi 22 kisiniń isi qaralyp jatyr.
