Men Gúlim Júsipbekovanyń «Qazaqstan daýysy» jobasynyń fınalyna ótkenin qalamaımyn - Medeý Arynbaev
ASTANA. QazAqparat - Tanymal qazaqstandyq estrada ánshisi Medeý Arynbaev «Qazaqstan daýysy» megajobasy sheńberinde aıaqasty málimdeme jasady. Ol óziniń tálimgerleriniń biriniń fınalǵa shyǵýyna qarsy ekenin aıtty. Bul týraly «Qazaqstan» respýblıkalyq teleradıokorporatsııasynyń baspasóz qyzmeti jobany uıymdastyrýshylarǵa silteme jasap habarlady.
«Men Gúlim Júsipbekovanyń «Qazaqstan daýysy» jobasynyń fınalyna ótkenin qalamaımyn. Árıne, maǵan tálimger retinde bulaı aıtý ońaı emes. Óıtkeni, tobymdaǵy úmitkerlerdiń bári maǵan birdeı. Degenmen, ádilin aıtatyn bolsaq, Gúlimge qaraǵanda Maqsat Maqulbekovtyń án oryndaý sheberligi basym, daýysy kúshti, kásibı deńgeıi joǵary», dedi Medeý Arynbaev.
«Betiń bar, júziń bar» demeı tik sóıleıtin Medeý shákirtine kóńili tolmaıtynyn jasyryp qala almady. Sońǵy kezderi Medeý men Gúlimniń arasynda túsinbeýshilik týyndaǵan kórinedi. Óıtkeni, tálimgeri usynǵan ándi shákirti aıtqysy kelmeıdi eken.
«Ár tálimger aqtyq synǵa eń júırigin qosqysy keledi. Men de jasyryp qaıteıin, aqpannyń 15-inde ótetin fınalda Maqsatty kórgim keledi. Biraq, Gúlimniń qoldaýshylary kóp bolǵandyqtan aldaǵy jeksenbi, 8 aqpandaǵy tikeleı efırde taǵy da Gúlim ozyp, Maqsat jobadan shyǵyp qala ma dep alańdap júrmin. Mundaı megajobanyń aqtyq synynda naǵyz dúldilder shaıqasýy tıis», - deıdi Medeý Arynbaev.
Óz kezeginde G.Júsipbekova tálimgeriniń jasaǵan mundaı málimdemesin túsinbeıtinin aıtty.
«Men Medeý Arynbaevty ánshi retinde syılaımyn. Jobanyń «Kórmeı tyńdaý» atty alǵashqy irikteý kezeńinde maǵan Medeý men Nurlan aǵalar qatar burylǵanda Medeýdi tańdaǵanmyn. «Shaıqas» kezeńinde meni qoldap, jobada qaldyrdy. Oǵan rızashylyǵym sheksiz», - deıdi Gúlim. Biraq sońǵy ýaqytta tálimgerin túsinbeı júrgenin aıtady.
«Daıyndyq kezinde Maqsatqa kóbirek kóńil bólip, maǵan mán bermeıdi, menimen jumys istemeıdi. Qazir ánderime Medeý aǵasyz ózim daıyndalyp júrmin. Bergen áninen bas tartqanym úshin renjigen shyǵar. Maǵan Janar Duǵalovanyń ánin oryndaýdy usyndy. Kelispedim. Óıtkeni Janardyń ánderi meniń tabıǵatyma kelmeıdi. Maqsat opera ánshisi, sondyqtan klassıkalyq ánderdi shyrqap keledi. Nege maǵan janyma jaqyn halyq ánderin oryndamasqa», - deıdi Gúlim Júsipbekova.
Aqpannyń 8-de ótetin tikeleı efır tartysty ótpek. Aqtyq synǵa kim joldama alady - Medeý Arynbaevtyń qoldaýyna ıe bolǵan Maqsat pa, álde halyqtan daýys kútken Gúlim be? Jeksenbi kúni, saǵat 21.00 ulttyq arnany qosyńyzdar! Jiberip almańyzdar.
Eger sizge unaǵan ánshi kelesi kezeńge ótsin deseńiz, qapy qalmaı daýys berińiz. Ol úshin ónerpazdyń rettik nómirin 3075 nómirine joldańyz nemese 8 80 90 80 30 75 nomerine telefon soǵyńyz. Maqsat Maqulbekov, rettik nómiri - 32. Gúlim Júsipbekova, rettik nómiri - 1.
