Men eshqandaı málimetti óshirgen joqpyn - Almaty zoobaǵynyń kassıri
ALMATY. QazAqparat - Almatyda 32 mln teńgeni jymqyrdy degen kúdikpen ustalǵan zoobaq esepshisiniń soty bastaldy, dep habarlaıdy QazAqparat tilshisi sot zalynan.
Іsti sýdıa Farrýh Omarov qarap jatyr.
Búgingi otyrysta sottalyp jatqan zoobaq kassıri Marına Nazarova sóıledi.
«Meniń mindetim tek qana AREM kassır baǵdarlamasy boıynsha bılet satý bolatyn. Al satylǵan bıletterdiń esebin «DIF-park» baǵdarlamasy arqyly júredi. Ol baǵdarlama boıynsha kiltsóz tek bas esepshi men bas dırektor Kárimovte bolǵan. Sondaı-aq, baǵdarlamany ornatqan Zınchenko da biletin. Bas esepshi Qaıyrbekova maǵan kiltsózdi qaldyrdy. Men tek 2,5 aptadaı ǵana paıdalandym. Odan keıin men bul júıege kiretin múmkindik bolǵan joq. Sebebi jańadan kelgen dırektor maǵan kiltsóz berilgenin estip, ashýlanyp, tez arada ózgertti», - dedi ol.
Onyń aıtýynsha, zoobaq dırektory aýysqan soń kassaǵa bóten adamdar kire bastaǵan.
«Jańa dırektordyń komandasy basa kóktep kirip, eshbir suraýsyz esep talap ete bastady. Qasymyzǵa bir qyzdardy kirgizip otyrǵyzyp qoıatyn boldy», - dedi ol.
Marına Nazarova bılet shyǵarý úshin satylyp alynatyn qaǵazdarda únemi aqaý kezdesetinin aıtty. 1 oram qaǵazdan 100 shaqty bılet jaramsyz bolyp shyǵady eken.
«Avtomat qaǵazdy bir qabyldap alǵan soń syrtqa shyǵarmaıdy. Boıaýlary durys jaǵylmaǵan soń, olar satylymǵa jaramaıdy. 2016 jyldyń qazanynda bıletterdi spısanıege jiberdim. Jeltoqsanda meni dırektor shaqyryp alyp 17 mln teńge jetispeı tur dedi. Men bıletterdi bazadan óshirgen joqpyn. Bárin dáleldeýge tyrystym, biraq meni tyńdamady», - dedi Nazarova.
Almaty zoobaǵy kassasyna qaǵaz jetkizýshi kásipker Andreı Ognevskıı DIF-Park júıesi týraly aıtyp berdi.
«DIF-Park týrnıketten ótkenderdi baqylaýǵa múmkindik beretin standartty júıe. Bılet satylsa shtrıh kod basylady. Derek engiziledi. Tarıfti baptaý júrgizý arqyly bılettiń baǵasyn ózgertýge bolady. Engizilgen málimetti ózgertýge de bolady. Bul úlken EXCELL tablıtsasy sııaqty. Eger málimet óshirilse de ol týraly tirkeledi. Biraq ishindegi málimetti ózgertý úshin tek paroldi bilgen az bolady. Ol úshin júıeniń qyr-syryn bilý kerek», - dedi A.Ognevskıı.
Aıta ketý kerek, 37 jastaǵy kúdikti Marına Nazarova 14 tamyzda ustalǵan bolatyn. Nazarova Marına QR QK 241-baby men 189-babynyń 4-bólimi negizinde aıyptalyp otyr.
Іs materıaldaryna sáıkes, Almaty zoobaǵynyń esepshisi bıletterdi satý barysynda kompıýterden 32 mln teńgeni joıyp jibergen.
Aldyńǵy sot otyrysynda Nazarovanyń áriptesteri, 2 kassırden jaýap alynǵan bolatyn.
