Men elimniń qoldaýyn árbir saıys barysynda sezemin - Qanat Islam
«Men ár kez saıysqa shyqqanda, ony teledıdardan kórsetsin-kórsetpesin, artymda qazaq degen ultymnyń taqymyn qysyp otyratynyn júregimmen sezemin. Halqymnyń qatty tebirenip, meniń kishkentaı bolsyn, úlken bolsyn, ár jolǵy saıysyma kóńil bólip otyratyndyǵyn bilemin. Sondyqtan, bul jeńisimdi de sol halqym qoldaǵan jeńisterimniń qataryna jatqyzamyn», - dedi Qanat Islam.
Sonymen qatar, ol kolýmbııalyq boksshy Hýan de Anhelmen bolǵan jekpe-jekke tyńǵylyqty daıyndalǵandyǵyn aıtty.
«Ol ońaı qarsylas emes edi. Onyń da ózine tán jetistikteri bar. Ol iri, menen kúshtileý jigit. Sondyqtan, salǵan jerden soqqylaspaı, áliptiń artyn baǵyp, ony kóp júrgizip, sharshatýdy uıǵardyq. Negizi qatty soqqylar jasaýdy altynshy-jetinshi raýndqa josparlaǵan edik», - dedi Q. Islam.
Budan basqa, ol osy jeńisiniń úlken álemdik dodalarǵa jol ashyp jatqandyǵyn atap ótti.
«Qazir maǵan ár túrli tujyrymdar boıynsha álem chempıony ataǵyna talasýǵa usynystar túsip jatyr. Alla buıyrsa, endi sol dodalardyń birine daıyndalýymyz kerek. Al aldaǵy jyldary eń mańyzdy saıystarymnyń birin Qazaqstanda ótkizgim keledi», - dedi Q. Islam.
Vıdeo Qamshy.kz saıtynan alyndy