Men de ishinara kinálimin — NASA ekıpajynyń komandıri Býtch Ýılmor
ASTANA. KAZINFORM — NASA astronavtary Býtch Ýılmor men Sýnı Ýılıams orbıtada uzaq bolyp Jerge oralǵan kezdegi sezimderin sıpattady, dep habarlaıdy VVS.

Juptyń Halyqaralyq ǵarysh stantsııasyna segiz kúndik mıssııasy Boeing Starliner-diń tehnıkalyq aqaýynan keıin toǵyz aılyq ǵaryshtyq odısseıaǵa aınaldy. Olar 19 naýryzda Florıda jaǵalaýynda sýǵa qonǵan SpaceX Dragon bortynda Jerge oraldy.
— 3 myń gradýstyq otty shardyń ishinde atmosfera arqyly ushyp, ǵaryshtan Jerge oralý — birtúrli sezim, biraq óte keremet, — dedi Býtch Ýılmor.
NASA-nyń dúısenbi kúni keshke ótken baspasóz máslıhatynda Ýılmordan Starliner-degi máselelerge kim jaýapty dep surady.
— Menen bastaýǵa bolady. Árıne, Starliner-de problemalar boldy. Onda Jerge oralýymyzǵa kedergi bolatyn belgili bir aqaýlar shyqty. Al men ózimnen bastaıyn, óıtkeni men keme komandıri retinde qoıýym tıis suraqtar boldy. Biraq men olardan suramadym — men tipti olardan suraý kerek ekenin bilmedim. Maǵan «kiná» degen sóz unamaıdy, biraq baǵdarlamanyń barlyq deńgeıinde jaýapkershilik bary sózsiz. Eger qalasańyz, meni de ishinara kináli dep esepteı alasyz, — dep jaýap berdi ol.
Ol úıge qaıtý problemalary úshin jaýapkershilik «barlyq tizbekte», sonyń ishinde NASA men Boeing-te de bar ekenin qosyp ótti.
Ǵaryshta uzaq ýaqyt bolǵan kezde AQSh Áskerı-teńiz kúshteriniń eki ardageri ashyq ǵaryshqa shyqty, ǵylymı eksperımentter júrgizdi, tipti HǴS bortynda santehnıkamen baılanysty máselelerdi sheshýge kómektesti.
— Biz óz mıssııamyzǵa degen qyzyǵýshylyqtyń qanshalyqty zor ekenin tipti baıqamaı qaldyq. Úıge oralǵanda, «oý, bizdi kóp adam kútip turdy» — bul ári qurmet, ári azdap uıat boldy. Biz jaı ǵana óz isimizben aınalystyq. Álem bizdi aınalyp otyrǵan joq, biraq biz onyń aınalasynda aınalamyz, — dep qosty Sýnı Ýılıams.
Astronavtar sondaı-aq orbıtada uzaq bolǵannan keıin Jerdi alǵash basqan kezdegi sezimderimen bólisip, alǵashqy kúnderi ne istegenin aıtyp berdi.
— Úıge qaıtyp oralý — bul keremet. Men tipti júgirýge de shyqtym. Baıaý bolsa da, betke jel soqqanyn seziný jáne aınalańda adamdardy kórý sondaı jaqsy. Bul — úı. Men jaı ǵana tósekke jattym. Toǵyz aıda birinshi ret tósekte jatý — aıtyp jetkize almaıtyn sezim. Kelesi kúnge deıin turmaı jattym. Sosyn ornymnan turyp, qozǵalyp, gravıtatsııaǵa qaıtadan úırenýge tyrystym. Ózime irimshikten jasalǵan tamasha sendvıch jasadym, — dep baıandady Sýnı.
Eske sala ketsek, Sýnı men Býtch oqıǵasy 2024 jyldyń maýsymynda bastaldy. Ǵaryshkerler Boeing kompanııasynyń Starliner ǵarysh kemesiniń alǵashqy synaǵyna qatysty.
Ǵarysh stantsııasyna ushý kezinde kapsýla birqatar tehnıkalyq aqaýǵa tap boldy, sondyqtan ǵaryshkerlerdi úıge qaıtarý tym qaýipti dep sanaldy.
NASA astronavtary toǵyz aı ǵaryshta bolǵannan keıin Jerge oralǵanyn jazǵan bolatynbyz.