Men de qyzymnan aıyrylǵan adammyn – Bıshimbaevtyń sotta sóılegen sózi
ASTANA. KAZINFORM – Elorda sotynda áıelin óltirdi dep aıyp taǵylǵan burynǵy mınıstr Qýandyq Bıshimbaev sóz sóılep, Saltanattyń týystarynan keshirim surady jáne ózi de bir kezderi qyzynan aıyrylǵanyn aıtty.
«Men tergeý men alǵashqy sot otyrysynan beri bolǵan oqıǵaǵa, Saltanattyń ólimine kináli ekenimdi aıtyp kelemin. Keshe meni júreksiz, istegen isine ókinbeıtin, azabyn sezinbeıtin adam dep kinálap jatty. Nemese Saltanatty únemi qaralady dep aıyptaýda. Shynynda da, bolǵan oqıǵaǵa men kinálimin. Vıdeodan kórgenderińizdeı, ustalǵan sátte-aq bárin moınydaǵanmyn. Alaıda eki kúnnen keıin esh túsindirmesiz, esh negizdemesiz maǵan eń qatal aıyp taǵylatynyn kútpedim. Súıgen adamym, jubaıym Saltanatty qasaqana oılastyryp, josparlap, asqan qatigezdikpen óltirdi dep aıyptaǵysy keledi», - dedi Q. Bıshimbaev.
Aıyptalýshy sol sátte qalaı áreket etý keregin bilmegenin aıtýda.
«Men jaı ǵana emotsıonaldy kúızeliske ushyradym, ne bolǵanyn túsine almadym, qabyldaı almadym. Men qatty ókinemin. Kún saıyn Qudaıdan meni keshirýin suraımyn. Sanaly nemese beısanaly túrde bolǵan is boldy. Qazir osynda bolýym kerek jáne ózimdi ustaýym kerek, múmkindiginshe ózimdi qorǵaýym kerek. Biraq bul ózimdi kinásiz dep sanaıtyn júreksiz adam ekenimdi bildirmeıdi. Munyń bárin bastan ótkerýim keregin túsinemin. Qandaı jaza berilse de, ony kúnániń óteýi retinde qabyldaımyn, áleýmettik jelilerde órship turǵan barlyq jekkórýshiliktermen qosa kóterýim kerek. Men ózimdi áste maqtan tutpaımyn. Ózimdi aqtaýǵa tyrysyp jatqandaı oılamańyzdar. Kez kelgen adam sekildi men de istegen isim úshin kez kelgen jazany kóterýge daıynmyn. Biraq Saltanatty qasaqana óltirý oıy bolǵan joq, munymen esh kelise almaımyn jáne ol úshin jaýapkershilik ala almaımyn», - dedi Q. Bıshimbaev.
Ol jábirlenýshi taraptan – Saltanattyń ata-anasynan jáne aǵasynan keshirim surady.
«Shynynda da, meniń ómirim osyndaı. Men de bir kezderi qyzymnan aıyryldym. 23 jasymda meniń de qyzym boldy. Eki jasynda aýrýdan shetinep ketti. Muny salystyrý múmkin emes ekeni túsinikti. Men ómirimde eshkimdi qasaqana óltirgim kelgen joq. Biraq ómirimizde osyndaı jaǵdaı oryn aldy», - dedi Q. Bıshimbaev.
