«Men de GGG sekildi qazaqpyn»: Golovkındi Dańq zalyna qabyldaý aldynda amerıkalyq jankúıerler erekshe qurmetpen qarsy aldy
Halyqaralyq boks dańqy zalyna qabyldanǵan tuńǵysh qazaqstandyq Gennadıı Golovkın AQSh-tyń Kanastota qalasynda jankúıerlerimen kezdesip, tarıhı rásim qarsańyndaǵy kóńil kúıimen bólisti.
Tarıhı rásim qarsańynda Gennadıı Golovkın AQSh-tyń Kanastota qalasynda óz jankúıerlerimen júzdesti. Qazaqstandyq boksshy «Museum Grounds» kesheninde ótken dástúrli «Ringside Talks» kezdesýi aıasynda jankúıerlermen erkin áńgimelesip, olardyń saýaldaryna jaýap berdi. Bul shara Dańq zalyna qabyldaý aptalyǵynyń basty oqıǵalarynyń biri sanalady.
Kezdesý barysynda jankúıerler áıgili boksshynyń sporttyq mansabyndaǵy qyzyqty oqıǵalardy tyńdap, ózderin tolǵandyrǵan suraqtaryn qoıyp, qoltańba aldy.
Dańq zalyna qabyldanǵan Gennadıı Golovkınge amerıkalyq buqaralyq aqparat quraldarynyń qyzyǵýshylyǵy da erekshe boldy. Belgili sportshydan suhbat alýǵa nıetti jýrnalısterdiń qarasy kóp edi.
Kelesi kezdesý Kanastota qalasyndaǵy orta mektepte ótti. Munda jankúıerler Golovkınnen qoltańba alyp qana qoımaı, arnaıy estelik buıymdardy satyp alý múmkindigine ıe boldy.
Qazaqstandyq boksshynyń qoltańbasyn alǵysy kelgenderdiń qarasy qalyń. Pavılon ishin toltyrǵan kezek syrtqa deıin sozylyp, jankúıerler Gennadıı Golovkınmen júzdesý úshin birneshe saǵat kútti.
Tarıhı sát qarsańynda Gennadıı Golovkın Kazinform agenttiginiń tilshisine suhbat berdi.
— Atyńyzdyń halyqaralyq boks tarıhynyń bir bóligine aınalýy sizge qandaı sezim syılaıdy?
— Meni qoldap, osy oqıǵany jurtshylyqqa jetkizip júrgenderińizge raqmet. Ne sezinip turǵanymdy eki aýyz sózben aıtyp berý qıyn. Bul — úlken maqtanysh. Rasynda da, tarıhı sát. Muhammed Álı, Maık Taıson sekildi bokstyń damýyna ólsheýsiz úles qosqan ańyzdarmen bir qatarda turý men úshin zor mártebe. Onyń máni óte tereń, mańyzy óte úlken.
Resmı saltanatty rásim erteń ótedi. Adam uzaq ýaqyt boıy umtylǵan maqsatyna jetkende, armany oryndalyp, eńbegi moıyndalǵanda qandaı kúı keshetinin sózben jetkizý ońaı emes. Bokspen aınalysyp júrgenime 35 jyldan asty. Bul — meniń ómirimmen bite qaınasqan jol. Biz ómir boıy birge kele jatqandaımyz.
Búginde álemdik boks qaýymdastyǵynyń, osy sporttyń tańdaýly ókilderiniń moıyndaýyna ıe bolyp otyrmyn. Menińshe, sportshy úshin budan asqan baqyt joq.
AQSh-ta Gennadıı Golovkınniń kásibı jolyn alǵashqy kúnnen beri baqylap kele jatqan jankúıerler az emes.
Chıkago qalasynan kelgen aǵaıyndy Erık pen Ostın Kanastotaǵa arnaıy at basyn buryp, qazaqstandyq boksshynyń Dańq zalyna qabyldaný rásimine qatysýǵa kelgen.
— GGG-diń Nıý-Iorktegi alǵashqy jekpe-jeginen beri jankúıerimin. Ol — keremet boksshy ǵana emes, óte qarapaıym adam. Menińshe, Ol orta salmaq tarıhyndaǵy eń úzdik boksshylardyń biri, — dedi Erık.
Al Ostın Golovkınniń mansabyn on jylǵa jýyq ýaqyt boıy baqylap júrgenin aıtty.
— Onyń jekpe-jekteri árdaıym erekshe áser qaldyratyn. Munda Qazaqstannan shyqqan sportshylardy jaqsy kóredi. GGG qarapaıym ortadan shyǵyp, álemdik deńgeıdegi juldyzǵa aınaldy. Endi onyń Dańq zalyna qabyldanyp jatqanyn kórý — úlken qýanysh. Ol bul qurmetke ábden laıyq, — dedi jankúıer.
Erık qyzyqty oqıǵasymen bólisip, óziniń otbasylyq ómirine Gennadıı Golovkınniń janama áseri bolǵanyn aıtty. Bolashaq jubaıymen tanysqanda onyń Qazaqstannan ekenin bilip, qazaqtarǵa degen yqylasy odan saıyn artqan.
— Jubaıym «Sen qazaqsyń ba?» dep surady. Men «Joq, men koreımin» dedim. Biraq kóbi meni qazaqqa uqsatady. Sol sátte «Men de GGG sekildi qazaq ekenmin ǵoı» dep ázildegenmin. Qazir otbasymyz bar. Sondyqtan belgili bir deńgeıde GGG-diń de úlesi bar dep aıta alamyn, — deıdi ol kúlip.
Al Alan Frederık Kanastotaǵa Golovkınniń qoltańbasyn alý úshin arnaıy kelgenin aıtty.
— Sońǵy jıyrma jyldaǵy eń úzdik boksshylardyń biri ekeni sózsiz. Onyń Dańq zalynan oryn alýy zańdylyq. Jurttyń bári ony jaqsy kóredi. Ol — álemdegi eń myqty boksshylardyń biri, — dedi Alan.
Taǵy bir jankúıer Bıll ómir boıy boksqa qyzyǵyp kele jatqanyn aıtyp, Kanastotaǵa Gennadıı Golovkınniń qoltańbasyn alý úshin kelgenin jetkizdi.
— Ol Dańq zalynan oryn alýǵa ábden laıyq. Golovkın — keremet boksshy. Kanelo Alvarespen ótkizgen jekpe-jekteriniń ózi kóp nárseni ańǵartady. Sondyqtan onyń bul qurmetke ıe bolǵanyna qatty qýanyp otyrmyn, — dedi Bıll.
Aıta keteıik, Gennadıı Golovkın 2023 jyly kásibı mansabyn aıaqtady. Qazir ol Qazaqstan Ulttyq olımpıada komıtetin basqarady. Sondaı-aq 2025 jyldyń qarashasynan beri World Boxing uıymynyń prezıdenti qyzmetin atqaryp keledi.
14 maýsymda qazaqstandyq boksshyny Halyqaralyq boks dańqy zalyna qabyldaýdyń resmı saltanaty ótedi.
