Men de adam balasymyn, Qudaıdan qorqamyn – Baqytjan Saǵyntaev qısaıǵan úı týraly

«Bizben kezdesýde qısaıǵan úıdi túzetip beremiz dep aıtylǵan bolatyn. 6 jyl buryn ǵımaratty salǵan baqylaýshy, qurylys kompanııasy organdary nege nashar jumys istegen? Bizdiń taǵdyrymyz ne bolady?» - dedi qala turǵyny.

Qala ákimi saýal qoıǵan turǵynǵa janaıqaıyn túsinetinin jetkizdi.

«Ózderińizben kezdesýde sizder suraq qoıǵan bolatynsyzdar. Osy úıdi birqalypqa keltirgen soń, qaıta qısaıyp qulamaı ma, oǵan kepildik beresiz be dep suraǵan edińizder. Men de adamnyń balasymyn, Qudaıdan qorqamyn. Men de eshkimniń nalasyna qalǵym kelmeıdi. Negizgi másele «úıdi túzettik, al kire qoıyńdar, problemanyń sheshimi tabyldy, endi sizderdi tanymaımyz» degende emes. Kóp sharalar atqaryldy. Instıtýttan mamandar shaqyryldy. Neden bolǵanyn qarady. Esebin qalaı ornyna keltirýge bolatynyn shyǵardy. Ornyna keltiretin jumystar júrgizilip jatyr. Ózderińiz bilesizder, sáýir-mamyr arasynda bul jumystar bitedi. Biz mamandardyń, tolyq táýelsiz sarapshylardyń qorytyndysyn kútemiz. Olardyń aıtýynsha, úıdiń jaǵdaıy birqalypty. Úıdiń qunyna baılanysty ártúrli usynystar kelip jatyr. Ol jerdi jalǵa alyp otyrǵandar da bar, ıpotekaǵa alyp otyrǵandar da bar. Jaqynda ózderińizdi jınap sheshimin aıtamyz», - dedi qala ákimi.

Almatyda qısaıǵan úıge qatysty zertteý qorytyndylary shyqty.

Mamandardyń pikirinshe, qısaıǵan úıdiń barlyq problemalary túpkilikti sheshilgenine kóz jetkizgenge, ıaǵnı úsh aıǵa deıin sozylýy múmkin. Sonymen qatar, Zerdeli yqsham aýdanyndaǵy barlyq 32 úı boıynsha zertteý júrgizilip, QazǴZI-diń usynymdary shyqpaq.

Qazirgi ýaqytta barlyq turǵyndar qala ákimshiligi esebinen jalǵa beriletin turǵyn úımen qamtamasyz etilgen. Adamdarǵa balalaryn balabaqshalar men basqa da bilim berý mekemelerine ornalastyrýǵa kómek kórsetilýde.

Aıta keteıik, Almatyda qala ákiminiń esep berý kezdesýi ótip jatyr. Oǵan 3200 adam jınaldy.