Men daryndy azamattardyń kıno áleminiń qupııasyna boılaýǵa kómektesemin - T.Bekmambetov

Búgin elordada ekshn-fılmderdiń II Halyqaralyq «ASTANA» kınofestıvaline arnalǵan baspasóz máslıhaty barysynda on-laın arqyly baılanysqa shyqqan festıval prezıdenti, belgili kınorejısser Tımýr Bekmambetov osylaı aıtty.

Óz sózinde T.Bekmambetov Astanada ótken alǵashqy kınofestıvalden keıingi aıtylǵan barlyq syn-eskertpelerdi moıyndaıtyndyǵyn jetkizip, osy jolǵy is-sharada bul kemshilikterge jol berilmeıtindigin erekshe atap ótti. «Byltyr Astanada ótken ekshn-fılmderdiń I Halyqaralyq kınofestıvalinen keıin biz tıisti syn-eskertpelerdi estip, kemshin tustardyń bolǵanyn túsindik. Eń bastysy, biz festıvaldiń negizgi maqsaty - qazaqstandyq kınematografıstermen ózara tájirıbe almasý jumysyna tıisti mán bergen joqpyz. Osy joly barlyǵy basqasha bolady dep senemin. Bul jumysta Sizderdiń de qatysý nıetterińiz asa qajet. Men daryndy ári naqty maqsaty bar azamattarǵa barynsha qoldaý kórsetip, kıno áleminiń qupııasyna boılaýǵa kómektesemin», - dedi T.Bekmambetov.

Qazirgi kezde T.Bekmambetov AQSh-tyń Jańa Orlean qalasynda óziniń jańa týyndysy - «Avraam Lınkoln - vampırlerdiń ańshysy» ekshn-fılmin túsirý jumysyn aıaqtaýda. Fılmde AQSh-tyń 16 -shy prezıenti A.Lınkoln ómiriniń qupııa tustary ashylady. Oqıǵa jelisi boıynsha kúndiz ol ózine júktelgen memlekettik jumysty atqarsa, túnde vampırlardy óltirip, halyqtyń tynyshtyǵyn saqtaǵan. Bul fılm 2012 jyldyń jazynda kórermen qaýymǵa kórsetilmek. «Jalpy, bul óte qyzyqty fılm bolady dep oılaımyn. Onda jaqsy men jamannyń kúresi, mahabbat pen ókinishtiń almasýy bar. Árıne, arnaıy qurylǵylardy qoldanatyn tustar da az emes», - deıdi T.Bekmambetov.