«Men - chempıon!» jobasyna qatysýshynyń qylyǵy kórermenderdi tańǵaldyrdy
KÓKShETAÝ. QazAqparat - Býrabaı kýrortynda respýblıkalyq «Men - chempıon!» jobasynyń fınaldyq kezeńi máresine jetti, dep habarlaıdy QazAqparat tilshisi
«Kóńildi start» baǵdarlamasynyń balamasy bolyp tabylatyn «Men - chempıon!» balalardyń sport oıyndary televızııalyq jobasy bıyl halyqaralyq deńgeıde ótip otyr. Oǵan elimizdiń 13 óńirinen 12-14 jastaǵy jasóspirimder qatysyp, óz ónerlerin kórsetti. Sonymen birge, Ózbekstannan jáne Reseı Federatsııasynyń Omby jáne Qorǵan oblystarynan da eki komanda qatysyp, kúsh synasty. Tartysty ótken jarysta Qaraǵandy oblysynan kelgen «Arystan» komandasy bas júldeni jeńip alsa, Aqmola oblysynyń «Jolbarys» komandasy ekinshi oryndy ıelendi. Júldeli úshinshi oryn Ózbekstan elinen kelgen komandanyń enshisine tıdi.
Oıynnyń eń qyzyqty kezeńi kapıtandardyń «Gladıatorlar» shaıqasy boldy. Osy jerde Qaraǵandy oblysynan kelgen komandanyń kapıtany Bektas Tuıabaı qarsylasyn jeńip turǵan kezde oıyn qarýyn tastap, baıqaýdy toqtatty. Ol ábden sharshaǵan qarsylasyn qushaqtap, demep, qulaýyna erik bermedi. Onyń mundaı qylyǵyna zaldaǵy kórermender men jankúıerleri rıza bolyp qaldy.
Sharanyń jabylýy saltanatyna arnaıy qatysqan Aqmola oblysynyń ákimi Málik Myrzalın kapıtandar saıysynda Bektastyń qylyǵyna tań qaldy.
«Bektastyń bekzattyǵy eń bastysy jeńis emes, adamı qasıet ekenin dáleldep berdi. Búgin «Men - chempıon!» jobasyna kelgender basty jeńis dostyq ekenine kóz jetkizip otyr», - dedi Málik Myrzalın.
Sonymen qatar, aımaq basshysy «Men - chempıon!» jobasy elimizdegi sporttyq sharalardyń eń tartymdysy ekenin aıta kele, keler jyly da fınaldyq oıyndar Býrabaı kýrortynda ótetinine senim bildirdi.
