Men bilim berýdi zertteýde, taldaýda, jetildirýde, qarjylandyrýda, baqylaýda sapa bolǵanyn qalaımyn - Oljas Quspekov
– Oljas Haırollauly, áńgimemizdiń basynda bilim berý isin bastaý qanshalyqty ońaı nemese qıyn ekenin aıtyp berseńiz.
– Qazir bilim berý salasynda kásip ashýǵa jeńilirek jaǵdaı jasalǵan. Bul jekemenshik balabaqshalardyń, mektepterdiń, kolledjderdiń ashylýy der edim. Bul oraıda, memlekettik-jeke menshik áriptestik baǵdarlamasyn da paıdalanýǵa bolady. Kásipkerler buǵan bıznes, úlken paıda dep qaramaı, kerisinshe, qandaı áleýmettik jaýapkershilik baryn túsinýi – basty shart. Eger kásipkerlerde lıtsenzııalaýdyń barlyq talaptary bolsa, negizinen olar qınalmaı bastaı alady.
– Siz óz bıznesińizdi bastaǵanda, komandańyz boldy ma? Eń birinshi sharýany neden bastadyńyz?
– Men qaı kezde de Astana qalasynda jumys istedim. Ózim de osynda oqydym, eńbek jolym osynda bastaldy, kolledjde qarapaıym oqytýshy bolyp eńbek ettim. Bilim mınıstrliginiń uıymdastyrý bólimine qarasty shtatta jumys istedim. Basqa da mekemelerde qyzmet atqardym. Osy tájirıbeniń barlyǵy bıznesti qurýǵa kóp kómektesti, Biz qazirdiń ózinde osy salada ózimizdi sýdaǵy balyq sııaqty sezinemiz jáne qaıda baratynymyzdy, ne isteıtinimzdi jaqsy bilemiz. Sondyqtan da biz 5-7 jyldyń ishinde bilim berýdiń normatıvtik salasyn lıberaldandyrdyq.
–Oljas Haırollauly, onda osy saladaǵyjeke jetistikterińiz týraly aıtyp ótseńiz.
– Naqty eńbegimizdi baǵalaıtyn alǵys hattarym óte kóp. Biraq men muny jetistik dep sanamaımyn. Men úshin eń úlken jetistik – TMD men Ortalyq Azııada birinshi oryn alýymyz. Biz alǵash ret testileýdi tsıfrlandyrýǵa qol jetkizdik, ıaǵnı testileý júıesine tolyq kompıýterlendirýdi, jasandy ıntellektti, kire beristegi bet-álpetti taný jáne pandemııa kezinde temperatýrany ólsheýdi engize aldyq.
Jasandy ıntellekt, tipti mynadaı jaǵdaıda da áreket etedi, mysaly, synyptastary UBT-ǵa birge kele qalǵan jaǵdaıda, qurylǵy olardy birge otyrǵyzbaıdy. Sybaılas jemqorlyq táýekelderin boldyrmaý turǵysynan kompıýterlik testileý óte tıimdi kómektesedi.
UStudy brendimen biz alǵashqy beınesabaqtardy túsire bastadyq, sodan keıin bul júıeni engizip, memlekettik deńgeıde jumys isteýdi jón kórdik.
–Eńbek jolyńyzda kásip ashýǵa kedergi bolatyn júıe boldy ma?Jańadan bastaýshylar úshin keńes bolsyn dep uqsańyz…
– Bıznesmenderdi yntalandyrý jáne olardy bilim salasyna tartý jáne sol arqyly memlekettiń jumysyn jeńildetý maqsatynda kóptegen tıimdi jobalar qolǵa alynyp jatyr qazir. Sol sebepten bul salada naqty mehanızmde jumys istep, jekemenshik mektepter ashýdan qoryqpaý kerek. Ony bastaýdyń quny 50 000 teńgeden 5 000 000 teńgege deıin barady.
– Áńgimeńizge rahmet!