Men aspaz bolyp ketetin shyǵarmyn - Qytaı elshisi
ASTANA. QazAqparat - QHR-dyń Qazaqstandaǵy Tótenshe jáne Ókiletti elshisi Chjan Hanxýeı óz elindegi aqparattyq texnologııalardy damytý jaıynda aıtyp berdi, dep xabarlaıdy QazAqparat tilshisi.
Elshiniń sózine qaraǵanda, búginde Qytaıda jasalǵan robottorǵa suranys joǵary. Al eksporttaǵy úles 40 protsentti qurap otyr. Atalǵan texnologııalardy qoldaný aıasy da keń. «Máselen, qazirgi kezde dáriger-robot bar. Oǵan ondaǵan ǵalym men dárigerdiń tájirıbesin engizip qoıǵan. Ol ózi de kóp nársege úırenip, tájirıbe jınaı alady. Dıagnozdy ózi qoıady da, emdeý sharalaryn belgileıdi. Árıne, ázirshe onyń janynda kádimgideı adam dáriger otyrady. Olar barlyq jazbalardy tekseredi. Endi, munyń barlyǵy tájirıbe júzinde qolǵa alynyp otyr. Degenmen, aldaǵy ýaqytta osy kúndelikti ómirimizge keledi», - deıdi Ch.Hanxýeı.
Onyń aıtýynsha, aqparattyq texnologııalardyń keńinen engizilýimen jumyssyzdyq máselesi de kúsheıedi. Buny Qytaı eli de jaqsy túsinedi. «Dıplomattar da jumyssyz qalatyn shyǵar (kúldi). Bizdiń saıasatymyzdy baǵdarlamaǵa salyp, sońǵy júzdegen jyldyń xalyqaralyq qatynastary týraly barlyq aqparatty engizse, ondaı robot Qytaı elshisinen de aqyldy bolady. Onda men qytaı asxanasynyń aspazy bolyp ketetin shyǵarmyn (kúldi)» , - dedi Ch.Hanxýeı.
Aıta keteıik, búgin elshi Ch.Hanxýeı jýrnalıstermen kezdesip, ekijaqty baılanystardy damytý jaıynda aıtyp berdi. Onyń sózine qaraǵanda, Qytaıdyń qazaq xalqyna degen qyzyǵýshylyǵy artyp keledi.
