Men árbir jaýyngerlik ushýymdy umytqan joqpyn - eki márte Keńes Odaǵynyń Batyry Talǵat Bıgeldınov
Men eshqashan da soǵys bolmaýyn tileımin. Beıbitshilik - jer ústindegi eń úlken baılyq», - dedi búgin Almatyda QazAqparat tilshisine eki márte Keńes Odaǵynyń Batyry, ańyzǵa aınalǵan ushqysh Talǵat Bıgeldınov.
28 gvardııashyl-panfılovshylar saıabaǵyndaǵy Máńgilik alaýǵa gúl qoıý saltanatyna qatysqan Uly Otan soǵysy ardagerleriniń arasynda Keńes Odaǵynyń Batyry, QR tuńǵysh qorǵanys mınıstri, «Halyq qaharmany», armııa generaly Saǵadat Nurmaǵambetov te boldy. Ol ardagerler áli de saptan shyqqan joq jáne eldiń qoǵamdyq ómirine belsene aralasýda, dep atap ótti.
S.Nurmaǵambetovtiń eske alýynsha, Jeńis kúnin ol Berlınde qarsy alǵan. «Bul kúndi áli umytqan joqpyn. Bul sheksiz qýanyshqa toly kún boldy. Soǵys tórt jylǵa jýyq ýaqyt sozyldy. Soǵystyń bir ǵana maqsaty - jaýdy jeńý boldy. Keńes jaýynerleri óz Otanyn ǵana emes, búkil Eýropanyń teń jartysyn azat etti. Bul jeńis keńes halqyna qymbatqa tústi, biz úlken shyǵyndarǵa dýshar boldyq. Maıdanǵa attanǵan 1 mıllıon 800 myń qazaqstandyqtyń teń jartysy ǵana elge oraldy. Al búginde olardyń tiri qalǵandary múldem az. Qazaqstannyń bul jeńiske qosqan úlesi orasan zor, dep sanaımyn. Aıta keteıin, sol jyldary SOKP OK ortalyq organy «Pravda» gazeti qazaqstandyqtardyń soǵys kezindegi erligi jaıly jıi jazyp turdy», - dep atap ótti Keńes Odaǵynyń batyry.
Soǵystan keıin ol Qarýly Kúshter qataryna qyzmet etti. «Meniń búkil ómirim armııamen baılanysty. Bizde qazir kúshti, saýatty, patrıot jastar ósip kele jatqanyn kórip otyrmyn. Óskeleń urpaqqa adamda bir ǵana Otan bolatynyn, ony qorǵap, gúldenýi úshin eńbek etý qajettigin umytpaýy tıis ekenin aıtqym keledi», - dep atap kórsetti armııa generaly.
