Meni ańdyp júr. Burynǵy súıiktisiniń sońynan qalmaǵan sheteldik elden shyǵarylady

PAVLODAR. KAZINFORM — Pavlodarda burynǵy qyzynyń qyr sońynan qalmaı, únemi ańdyp júrgen Tájikstan azamaty ustaldy.

Tártip saqshylary onyń Qazaqstanda bolý merzimin buzǵanyn anyqtap, el aýmaǵynan shyǵarýdy uıǵardy.

Pavlodarlyq arý polıtsııaǵa óz betimen júginip, Tájikstan Respýblıkasynyń azamatyna qatysty sharalar qoldanýdy suraǵan. Anyqtalǵandaı, olar buryn birge turǵan. Ajyrasqannan keıin er adam onyń sońynan qalmaı, únemi ańdýyn qoımaǵan. Tipti, ony qorqytý mazmunynda habarlamalar jiberip, balaǵat sózder aıtyp, kúsh qoldanatynyn jetkizgen.

— Tártip saqshylary sheteldiktiń QR aýmaǵynda bolý merzimin buzǵanyn anyqtady. Ol ustalyp, ákimshilik jaýapkershilikke tartyldy jáne keıinnen elden shyǵaryp jiberýge sheshim qabyldandy. Tájikstan Respýblıkasynyń Elshiliginde qujattandyrý úshin qabyldaǵysh-taratqyshqa ornalastyryldy, — dep habarlady Pavlodar oblysy polıtsııa departamentiniń baspasóz qyzmetinen.

Er adamnyń tarapynan bolǵan qoqan-loqylar men ańdýlarǵa baılanysty qyz buryn polıtsııaǵa júginbegen. Bári óz betimen sheshiledi dep oılaǵan.

Eske sala keteıik, Pavlodarda 2 jasar qyzdy uryp, buǵanasyn syndyrǵan ógeı áke ustalǵanyn jazǵan edik.