Men Almatyda Kopengagen qalasyndaǵydaı ózgerister oryn alǵanyn qalaımyn - ıAn Geıl
ALMATY. QazAqparat - Búgin Almatyda belgili danııalyq sáýletshi jáne qala dızaıny boıynsha keńesshi ıAn Geıl qalanyń 8 aýdanynyń ákimderimen júzdesip, qalanyń ınfraqurylymyn damytý jóninde óz tujyrymdamasyn tanystyrdy.
Buǵan deıin ol qala ákimi Baýyrjan Baıbekpen kezdesip, Almaty qalasynan arnaıy delegatsııany Danııanyń astanasyna shaqyrǵan bolatyn. Ondaǵy maqsat - Kopengagen qalasynyń ınfraqurylymymen jete tanystyrý.
Aýdan ákimderimen kezdesý barysynda ıAn Geıl Kopengagen qalasynyń sońǵy 50 jyl ishindegi damý barysy týraly sóz qozǵady. Sáýletshi bul ýaqytty birneshe kezeńderge bólip kórsetti. Qalada osy ýaqyt ishinde júrginshi joldary, kólik júrmeıtin alańdar, velo joldar. demalys oryndary, sport jáne balalar alańqaılary kóptep salynǵan. ıAǵnı, qalanyń árbir jerin adam úshin tıimdi, utymdy paıdalaný kózdelgen.
«Biz kóp jyldar qalaǵa adam shaqyrýdy oılaǵanymyzben kólik «shaqyrýmen» boldyq qoı. Bul jasyryn emes. Eger de biz Almaty kósheleriniń enin eki esege ulǵaıtsaq ne bolar edi? Keptelis máselesi sheshiler me edi? Joq, kerisinshe 5-10 jyldyń ishinde qaladaǵy kólik sany eki esege deıin kóbeıip keter edi. Muny ómirdiń ózi kórsetip otyr. Biraq eger de adamdardy «shaqyrsaq she? Onda árıne adamdar kóbeıedi! Adamǵa arnap jasalǵan dúnıe ózine adamdardy tartady. Men Almatynyń da osy baǵytta damyǵanyn qalar edim. Biz óz tujyrymdamamyzda turǵyndarǵa óz ýaqyttaryn qoǵamdyq keńistikte meılinshe kóbirek ótkizýge múmkindik jasaý úshin, solarǵa arnalǵan tartymdy qoǵamdyq oryndardy kóptep jasaýǵa tyrystyq», - dedi ıA. Geıl.
Sáýletshi ákimderdi qalada velosıped joldaryn kóptep jasaýǵa jáne turǵyndardy velosıpedpen kóbirek júrýge shaqyrdy.
«Velosıped joldary júıesi men qoǵamdyq kólik júıesi bir-birimen baılanysta bolǵany jón. Sonda jolaýshy joldyń bir bóligin qoǵamdyq kólikpen júrse, basqa bóligin velosıpedpen júrip óte alady. Danııada bul júıe bir kúnde júzege asa salǵan joq. Ol qazir de damý ústinde. Bizde árbir bes jyl saıyn kelesi bes jyldyqqa jańa mindetter men josparlar jasalady», - dedi maman.
Onyń aıtýynsha, qazirgi tańda Kopengagen qalasy turǵyndarynyń 45 paıyzy velosıpedpen júredi eken.
«Árbir jańa júıe, mádenıet dástúrge aınalýy úshin birshama ýaqyt ótýi kerek. Qala josparyn ázirlep, ony halyqqa jetkizý arqyly olardyń sanasyna oı salýǵa bolady. Kopengagenniń eki mańyzdy ustanymy bar. Olar: tartymdy qoǵamdyq keńistikti jáne velosıped ınfraqurylymyn jasaý arqyly turǵyndardyń densaýlyǵy men qala ekologııasyn jaqsartý», - dedi ıAn Geıl.
