Men alǵashynda Prezıdent kúni merekesine qarsy bolǵanmyn - N. Nazarbaev
Suhbat barysynda jýrnalıstiń Tuńǵysh prezıdent kúni týraly suraǵyna jaýap bergen Memleket basshysy, tarıhqa kóz júgirter bolsaq, AQSh-ta 1855 jyldan bastap Prezıdent kúnin atap ótip kele jatqanyn, bul mereke AQSh-tyń tuńǵysh prezıdenti Djordj Vashıngtonnyń qurmetine arnalǵan aıta kelip, bizdegi Prezıdent kúnin qalaı toılaý kerektigin tilge tıek etti.
«Biraq bizde, ádettegideı, burmalaý oryn alady. Bul Nazarbaevtyń jeke merekesi emes. Máseleniń mánisi mynada, 1991 jyly 1 jeltoqstanda tuńǵysh ret Qazaqstan óziniń jańa damý jolyn - prezıdenttik basqarýdy tańdap aldy. Búkilhalyqtyq referendým prezıdentti saılaı otyryp, elimizde prezıdenttik bılikti belgilep berdi. Jáne 1991 jyldan bastap jumys istep kele jatqan prezıdenttik vertıkaldyń arqasynda el tabysqa qol jetkizdi. Merekeni de dál osy qyrynan atap ótý qajet», - dedi Nursultan Nazarbaev.
Osydan keıin Prezıdent keıbir belsendilerdiń shekten shyǵyp ketetinin atap ótti.
«Osyǵan baılanysty men bizde ótkenniń jaqsyatty bolý daǵdylarynyń áli de qalǵanyn: jaǵalaı Prezıdent portretterin ilýdiń bar ekenin aıtpaqpyn. Bul boıynsha men eleýli eskertýler de jasadym. Iá, álemde mundaı bar. Biraq meniń fotosýretterim, eger men qatty unaıtyn bolsam, jumys ústelinde nemese úıde, sheneýnikter kabınetterinde belgilengen kólemde tursyn. Onymen áýestenýdiń qajeti joq, biz munan áldeqashan ótkenbiz!» - dedi ol.
«Tuńǵysh Prezıdent kúni - jaqsy mereke. Biraq ony Qazaqstan damýy tarıhynyń jańa dáýiri - búginde tıimdiligin halyq kórip otyrǵan prezıdenttik basqarýǵa kóshý kúni retinde atap ótý kerek. Bizdiń ındýstrııamyz, tabysty memleketimiz, Qazaqstannyń bedeli - osynyń barlyǵy biz qurǵan prezıdenttik respýblıkanyń nátıjesinde múmkin boldy. Men atalǵan meıramnyń osy turǵyda toılanǵanyn qalaımyn», - dep oıyn qorytyndylady Memleket basshysy.
